Кеше сағат 18:20-да Өскемен әуежайына Қытайдан 14 тонна медицина құрал-жабдықтары жеткізілді. Оның ішінде 100 мың экспресс-тест, 18 мың қорғаныш костюмы, 80 мың респиратор, 10 мың медицина маскасы, 10 мың экран және 10 мың көзілдірік бар.

Облыс әкімдігінің ақпаратынша, экспресс-тестен әуелі алдыңғы шепте жүрген медицина, санитария-эпидемиология және құқыққорғау саласының қызметкерлері өтеді.

Бұған дейін облыс әкімі «Қытайдан алынатын медицина құрал-жабдықтарына «Парыз» қорының қаржысы жұмсалатынын», оны «Шыңжаңдағы серіктес «Сан Бао» корпорациясынан сатып алатынын» айтқан.

Әкімдік ақпаратына сенсек, аталмыш корпорация ШҚО тұрғындарына өз тарапынан Alena-310 деп аталатын 2200 дана маска, 200 мың бірреттік ине және 10 миллионнан астам теңгеге градустандырылған дәрі тамызғыш қосып жіберген.

Құрал-жабдықтар Денсаулық сақтау басқармасының қоймасына жеткізіліп, пайдалануға дайындалады. Алдағы уақытта қалалар мен аудандардың қажетіне жұмсалады.