Ұлан ауданының Пролетарка ауылындағы көшелерге су жайылып, бірнеше үй мен аула аумақтарын алып қалды, деп хабарлайды Алтайньюс тілшісі.

5 маусым күні толассыз жауған жаңбырдың салдарынан 4 аула аумағы мен 3 тұрғын үйге су жайылған екен.

Қазір әлеуметтік желіде Пролетарка ауылында түсірілген бейнежазба таралып жатыр.

- 5 маусым. Ұлан ауданы, Пролетарка ауылы. Жарық жоқ, үйлерді су басып жатыр. Адамдардың барлығы көшеде жүр, - дейді бейнежазба авторы.

Анықталғандай, ТЖ қызметкерлері суды толығымен кетіріп, үйлерін су басқан отбасыларды қауіпсіз жерге көшірді. Барлығы 7 адам, оның ішінде 3 бала қазіргі уақытта туыстарының үйіне орналастырылыпты. Зардап шеккендер мен жарақат алғандар жоқ.

Айта кетсек, бұдан бөлек, Глубокое ауданының Белоусовка ауылында да екі аула мен бір тұрғын үйге су жайылғаны белгілі болып отыр.