Шығыс Қазақстанда желтоқсан күнінің бұрқасын бораны бірден үш бағыттағы жол қатынасын тоқтатты. Кешкі уақыттан бастап аймақта көлік қозғалысына шектеулер енгізіліп, жүргізушілерге сақ болу ескертілуде, деп хабарлайды Altainews.kz.

Алдымен, сағат 17:00-де «ҚАЖсервис» ШҚО филиалы республикалық маңызы бар «Алматы – Талдықорған – Өскемен – Шемонаиха – РФ шекарасы» трассасының Абай облысы шекарасы мен Алмасай ауылының бұрылысы арасындағы (1013–1062 км) бөлігін жабылғанын хабарлады. Бұрқасын, жолдың көрінбеуі және қатты жел бұл бағыттағы қозғалысты аса қауіпті етуде.

Ал сағат 18:30 шамасында дәл сол ауа райы салдарынан «Өскемен – Алтай – Үлкен Нарын – Катонқарағай – Рахманов қайнары» автожолының Ушановское ауылы мен Алтай қаласы арасындағы (6–166 км) бөлігі де барлық көлік үшін жабылады.

Осы уақыттан бастап облыстық маңызы бар тағы бір жол – «Өскемен – Таулы Үлбі – Северное» бағыты да қозғалысқа уақытша тоқтатылады. «ОблШығысЖол» ЖШС таратқан дерекке сәйкес, боран, қар, көктайғақ және көрінбеудің нашарлауы салдарынан 45–60 км аралығы жабылады.

Қатаң мінез көрсеткен желтоқсан бораны аймақтағы жол қауіпсіздігін айтарлықтай қиындатып тұр. Төтенше жағдай мамандары мен жол қызметі тұрғындардан қажетсіз ұзақ сапардан бас тартып, ресми хабарламаларды қадағалап отыруды сұрайды.