Қазақстанда коммуналдық энергетика саласының тұрақтылығын қамтамасыз ету және мемлекеттік қолдау тетіктерін күшейту мақсатында салықтық өзгерістер қарастырылуда. Мәжілістің пленарлы отырысында депутат Еділ Жаңбыршин коммуналдық энергия компанияларына қатысты фискалдық жүктемені жеңілдететін заң жобасын таныстырды, деп хабарлайды Altainews.kz тілшісі ел Мәжілісіне сілтеме жасап. 

Депутаттың айтуынша, қолданыстағы салық тәртібі коммуналдық энергия өндірушілерге бөлінетін субсидиялардың нақты тиімділігін төмендетіп отыр. Мемлекеттен қолдау алғанымен, оның елеулі бөлігі қайтадан бюджетке салық ретінде қайтарылады.

Депутат бұл мәселені былай түсіндірді:

Оның сөзінше, қолданыстағы Салық кодексіне сәйкес субсидия табыс ретінде есептеледі және бұл кәсіпорындарды корпоративтік табыс салығын төлеуге міндеттейді.

Депутаттың айтуынша, мұндай жүйе субсидиялардың мақсатты түрде пайдаланылуына кедергі келтіріп, коммуналдық кәсіпорындардың қаржылық мүмкіндіктерін шектейді. Бөлінген қаражат қарыздарды жабуға, инфрақұрылымды жаңартуға немесе өндірістік қуатты арттыруға бағытталуы тиіс, алайда қазіргі жағдайда бұл мүмкін болмай отыр.

Осы себепті заң жобасы субсидияларды корпоративтік табыс салығынан босатуды көздейді.

Заң жобасы қабылданған жағдайда коммуналдық энергия компанияларының қаржылық тұрақтылығы артып, инфрақұрылымды жаңғыртуға бағытталған жобалар тиімді іске асырылмақ. Бұл өз кезегінде халыққа көрсетілетін қызметтің сапасына және жүйенің жалпы тұрақтылығына оң әсер ететіні күтіледі.