«Ауыл» халықтық-демографиялық партиясының атынан президент сайлауына Төлеутай Рахымбеков түседі, деп хабарлайды Алтайньюс тілшісі.

Партияның кезектен тыс XV съезін өткізген «ауылдықтар» өз үміткерін ұсынды.

– Әртүрлі ойлар айтылды, пікірталас болды. Бірақ бүгін партия саяси кеңесінің отырысында бір шешімге келдік. Біз Төлеутай Сатайұлын үміткер ретінде ұсынамыз, – деді «Ауыл» партиясының төрағасы Әли Бектаев.

Төлеутай Сатайұлы Рахымбеков 1964 жылы Қарағанды облысы Жаңаарқа ауданының Атасу кентінде туған.

1986 жылы Қазақ ауылшаруашылық институтын инженер-механик мамандығы бойынша үздік бітірген. 1992 жылы Мәскеуде Бүкілодақтық ауыл шаруашылығын электрлендіру ғылыми-зерттеу институтының аспирантурасын тәмамдаған. 2001 жылы Е. Бөкетов атындағы Қарағанды мемлекеттік университетін  заңгер мамандығы бойынша бітірген. 2005 жылы Экономика ғылымдарының докторы атанған.

Еңбек жолын ол 1986 жылы Қазақ ауылшаруашылық институтының кіші ғылыми қызметкері, аспиранты болып бастаған. 1987 жылы - Жезқазған облысы Жаңаарқа ауыл шаруашылығын механикаландыру және материалдық-техникалық жабдықтау кәсіпорнының (ауданауылшартехника) инженер-ақау жөндеушісі, цех шебері, аға бақылаушы шебері, аға инженер-технологы.

1989 жылы - Бүкілодақтық ауыл шаруашылығын электрлендіру ғылыми-зерттеу институтының аспиранты. 1992 жылы - «Жазира» ШЖК директоры, «Дана» ШЖК директоры, «ДанаБизнес» шағын бизнес орталығы» АҚ президенті, «Жезқазған облыстық шағын және орта бизнес орталығы» ЖШС бас директоры. 1999 жылы - Қарағанды облысы Сәтбаев қаласы  әкімінің орынбасары. 2001 жылы - О.Байқоңыров атындағы Жезқазған университетінің кафедра доценті.

2002 жылдан - ҚР Ауыл шаруашылығы министрлігінің басқарма бастығы, департамент директоры. 2006 жылы - ҚР Көлікжәне коммуникациялар министрлігінің департамент директоры. 2007 жылдан - ҚР Ауыл шаруашылық министрлігі жанындағы «ҚазАгроИнновация» АҚ президенті. 2009 жылдың наурызынан - ҚР Премьер-министрі орынбасарының кеңесшісі. 2009 жылдың қарашасынан - «Қазақстан тұрғын үй-коммуналдық шаруашылығын модернизациялау және дамыту ортағы» АҚ басқарма төрағасы. 2009 жылдың желтоқсанынан бері - Қарағанды облысы әкімінің орынбасары болды. Кейінірек, ТКШ ұлттық палатасын, «Атамекен» ҰКП Агробірлік орталығын басқарып, ҚР ауыл шаруашылығы вице-министрі қызметін атқарған. 2019 жылдың сәуір айынан бері «Ұлттық аграрлық ғылыми-білім беру орталығы» АҚ басқарма төрағасы болды.