Өскеменде аулаларды абаттандыру жұмыстары жалғасуда
Облыс орталығында «Халық қатысатын бюджет» бағдарламасы аясында бірқатар аулалар абаттандырылып жатыр. Балаларға ойын алаңы мен воркаут-аймақтар орнатылып, көлік тұрақтары кеңейтілген.
Қала әкімдігі ағымдағы жылы бұл жұмыстармен 27 аула қамтылатынын мәлімдеген болатын. Бүгін шаhар басшысы Жақсылық Омар жұмыс барысын бақылап, тұрғындардың пікірін тыңдап қайтты, деп хабарлайды Altaynews тілшісі.
- Қазір жұмыстары толықтай аяқталмаған 2 жобадағы нысандар бар. Соның бірі – аулаларды абаттандыру. «Халық қатысатын бюджет» бағдарламасы бойынша атқарылып жатқан кейбір жұмыстар әлі де аяқталған жоқ. Сондықтан қазір мердігерлермен кездестім. Қыс мезгілі жақындап қалғандықтан барлық жұмыстарды тезірек аяқтауымыз керек. Біз тұрғындарға берген уәдемізде тұрамыз. Ешқандай аула аяқсыз, қар астында қалмайтын болады, - деді Жақсылық Омар.
Қазір Михаэлис, 24, 26, 26/1 мекенжайындағы үйлердің ауласы аяқталуға жақын. Онда кішкентай бүлдіршіндер үшін ойын алаңдары салыныпты.
- Қазір ауламыз өте әдемі, барлығының сапасы көңілімізден шығып жатыр. Халықпен санасып, осындай бағдарламаны жүзеге асырып жатқан жергілікті билік өкілдеріне алғыс білдіргім келеді. Енді балаларымыз жаңа аулада ойнайтын болады. Тұрғылықты жеріміздің одан әлі құлпыруына өзіміз де ат салытасын боламыз. Түрлі гүлдер отырғызып, ауланы күтіп ұстаймыз, - деді қала тұрғыны Лариса Власова.
Назарбаев даңғылы, 2 мекенжайында да қазір абаттандыру жұмыстары жүргізіліп жатыр. Мұндай балалар алаңынан бөлек, воркаут-аймақтары орнатылған. Көлік тұрағы кеңейтіліп, үйдің қасбеті де жаңартылған көрінеді.
Оқи отырыңыз
