ШҚО-ға 40 кадет тағылымдамадан өтуге келді
Фото: Өскемен гарнизонының баспасөз қызметі
Өскемен гарнизонының 27943 әскери бөлімінде Шоқан Уәлиханов атындағы Әскери колледжінің 40кадеті отыз күндік әскери тағылымдамадан өтуде.
Тағылымдама барысында болашақ кәсіпқой сержанттар әскери колледжде алған теориялық, практикалық дағдылары мен шеберліктерін пысықтайтын болады, деп хабарлайды Altaynews.kz тілшісі.
Қарулы күштердегі шынайы қызметке дайындалады. Сондай-ақ, бөлімшелерді басқарудағы лауазымдық міндеттерін атқарудың қыр-сырын меңгереді. Кадеттер 1 ай көлемінде мотоатқыштар батальонында бөлімше командирі ретінде біліктіліктерін арттырады.
Кадет өзінің көшбасшылық қасиеті мен сеніп тапсырылған бөлімшемен жұмыс істеу әдістемесін пысықтай отырып, командалық-әдістемелік дағдысын шыңдайды. Ал олардың іс-қимылын рота сержанттары мен взвод командирлері қадағалайды. Аға әріптестері мен тәлімгерлері ретінде олардың мықты және осал тұстарын айқындай отырып, консультативті және әдістемелік көмек көрсетеді.
Болашақ сержанттың командалық машықтарын бекіту үшін тағылымдама барысында 27943 әскери бөлімінде кадеттің көшбасшылық қасиетін жетілдіруге бағытталған шаралар іске асырылады. Оның қатарында бөлімшелердің жауынгерлік атыс дайындығы бар.
