Бақтияр Артаевқа Вел Баркер кубогы қайта табысталады. Дәл қазір кубоктың дубликаты дайындалып жатыр, деп хабарлайды Altainews.kz тілшісі.

Еске салайық, 2021 жылы Сербиядағы әлем чемпионатында даңқты спортшы бағалы жүлдесін ресми түрде Халықаралық бокс федерациясына табыстаған. Сол кезде федерация өкілдері кубоктың сапалы көшірмесі жасалатынын, содан кейін спортшыға қайтарылатынын айтқан.

 Вел Баркер кубогы 1936 жылдан бері Олимпиададағы ең үздік боксшыға табысталып келеді. Яғни төрт жыл сайын қолдан қолға өтіп отырады. Төрт жыл сайын кубоктың жиегіне жаңа есім жазылады.

Дәл осындай бағалы жүлде төртжылдықтың басты спорттық додасында көк байрақты аспандатқан отандасымыздың қолында біржола қалатын болды.

Наурызда елорда төрінде Бақтияр Артаев жүлдесіне арналған халықаралық бокс турнирі өтеді. Халықаралық бокс федерациясы осы доданың ашылу рәсімінде кубокты ресми түрде отандасымызға табыстауды жоспарлап отырған көрінеді.