19 қаңтар күні сағат 13:30-да «Қазселденқорғау» мекемесінің мәліметі бойынша, Алтай ауданында республикалық маңызы бар «Өскемен – Алтай» автожолының 64-шақырымында қардың көп жаууы салдарынан өздігінен қар көшкіні жүрді.

Қазіргі уақытта көшкіннің көлемі нақтыланып жатыр. Зардап шеккендер мен қираулар жоқ. 

Жолды қардан тазалау жұмыстарын «КАЖ сервис» ЖШС жүргізуде. Қар тазалауға 4 арнайы техника жұмылдырылған.

Шығыс Қазақстан облысының Төтенше жағдайлар департаменті тұрғындарға ауа райының қолайсыздығына байланысты сақтық шараларын қатаң ұстануды ескертеді. Қауіпті аймақтарда тоқтамау, мүмкіндігінше қауіпсіз жерге ауысу ұсынылады. Кез келген төтенше жағдай кезінде 112 нөміріне хабарласуға болады.