Ел Президентінің тапсырмаларын және «Халықтың табысын арттырудың 2025 жылға дейінгі бағдарламасының» кешенді жоспарын орындау мақсатында «AMANAT» партиясының «Ауыл аманаты» жобасы жүзеге асып жатыр. Жобаның негізгі шартына келетін болсақ, тұрғындарға 2,5% мөлшерлемесінде несие беру арқылы ауылдық округтегі кәсіпкерлікті кешенді дамыту және оларға қызмет көрсететін сервистік-дайындау кооперативін құру.

Осыны басшылыққа «Ауыл аманаты» жобасының өкілдері Шығыстағы елді мекендерді аралап, ақпараттық-түсіндіру жұмыстарын жүргізуді бастап кетті.

– Ұлан ауданындағы Бозанбай және Тарғын ауылдарының тұрғындарымен кездестік. Тұрғындар несие алу кезінде кепілдікке қойылатын жылжымайтын мүлікке байланысты және шағын кооперация құруға қатысты сұрақтар қойды.  Жобаның негізгі мақсатын жан-жақты талдап түсінірген кезде тұрғындар қызығушылық танытып, ұсыныстарын айтып, ортаға тың ой тастады, – дейді «Ауыл аманаты» жобасы бойынша бизнес-тренер Жұмагүл Мақашева.

Естеріңізге саламыз,  бұған дейін аталмыш жобаның бірінші бөлігі жүзеге асырылды. Ол кезде, 11-20 шілде аралығында, «AMANAT» партиясының Саяси менеджмент академиясы ауыл және ауылдық округ әкімдерін оқытуды ұйымдастырған. Оқуға Шығыс Қазақстан және Абай облысынан 240 әкім қатысты.