Шығыс Қазақстан облысында құр атпақ болған аңшы ұсталды, деп хабарлайды Алтайньюс тілшісі.

Бесқарағай аудандық полиция бөлімінің қызметкерлері 17 қазан күні  заңсыз түрде құр атпақ болған тұрғынды ұстады.

– Полиция қызметкерлері 55 жастағы тұрғыннан патроны бар 12 калибрлі екі ұңғылы мылтықты тәркілеп алды, – деп мәлімдеді ШҚО ПД басшысы Сағат Мәдиев.

Полиция департаменті баспасөз қызметінің мәлімдеуінше, браконьерге қатысты ҚР ӘҚБтК-нің 382-бабы 3-бөлігі бойынша әкімшілік хаттама толтырылды. Сондай-ақ Бесқарағай тұрғыны құс атпақ болған аумақ «Семей Орманына» қарасты жер. Яғни ҚР «Ерекше қорғалатын табиғи аумақ туралы» Заңының 48-бабы 4-тармағына сәйкес бұл аумақта аңшылыққа жол жоқ.

Айта кетейік, аймақ көлемінде «Браконьер» жедел алдын алу іс-шарасы жүргізіліп жатыр.