Шығыс Қазақстан облысының тұрғыны заңсыз түрде балық аулағаны үшін жауапкершілікке тартылды, деп хабарлайды Алтайньюс тілшісі.  

Бұған дейін хабарлағанымыздай, аймақ көлемінде «Браконьер» жедел алдын алу іс-шарасы басталды. Бүгін шараның екінші күні. Көкпекті ауданы полиция бөлімінің қызметкерлері Зайсан көлінен заңсыз түрде балық аулап жүрген Тассай ауылының тұрғынын ұстады.

- Ауыл тұрғынынан 500 метрлік ау, резеңке қайық және 80 келіден астам балық тәркіленді. Келтірілген шығын көлемі – 304 мың теңге. Айыпты азаматқа қатысты ҚР Қылмыстық кодексінің 335-бабы 3-бөлімі 2-тармағы бойынша сотқа дейінгі тергеу амалдары жүргізілуде, – деп мәлімдеді аудандық полиция бөлімі.