ШҚО-да қазақтан шыққан тұңғыш полиция генерал-лейтенантына ескерткіш қойылды
Қайнар ауылында бұрынғы Абыралы ауданының 90 жылдығы кең көлемде аталып өтті. Осыған орай Қазақ КСР ішкі істер министрі болған генерал-лейтенант Шырақбек Қабылбаевқа арналып ескерткіш-бюст орнатылды.
Биыл мемлекет және қоғам қайраткері, Қазақ КСР ішкі істер министрлігін 12 жыл басқарған, қазақтан шыққан тұңғыш полиция генерал-лейтенанты Шырақбек Қабылбаевтың туғанына 110 жыл толып отыр. «Абыралы-Дегелең» қоғамдық қорының ұйытқы болуымен Қайнарда, ұлт қайраткеріне арналған бюст бой көтерді. Нартұлғаның кеуде мүсінін Ертіс Татиев сомдап шыққан.
Семей мен Қайнардың ортасын жалғаған ойдым-ойдам жолға қарамастан, торқалы мерейтойға алыс-жақыннан қадірлі меймандар ағылды. Олардың арасынан «Генералдар Кеңесі» республикалық қоғамдық бірлестігінің төрағасы, әділет генерал-майоры Рүстем Қайдаров, ҚР ішкі әскерлер ардагерлер Кеңесінің төрағасы, генерал-майор Өмірзақ Болсамбеков және Павлодар облысы бойынша ішкі істер органдары мен ұлтық ұлан әскерлері ардагерлер кеңесінің төрағасы Темірхан Дуанбеков табылды.
Сонымен қоса, 90 жылдыққа орай Қайнарда «Абыралы - Сарыарқаның кіндігі» атты ғылыми-тәжірибелік конференциясы ұйымдастырылды. Аузы дуалы ғалымдар мен тарихшылар жиналған басқосуда «Атыңнан айналайын, Абыралым» кітабының таныстырылымы өткізілді. Бұл еңбекті белгілі ақын, ғалым Бауыржан Жақып құрастырған. Әзірге туындының 200-дей данасы жарық көрді. Оның 100 данасын Қазақ ұлттық университетінің ректоры Ғалымқайыр Мұтанов шығаруға көмектесіпті.