Ақтылы түлік өсіріп отырған Абай ауданында қой жүнін өңдеу қайтадан қолға алынды.

Аудандағы «Дерикар» ЖШС қой жүнін өңдеуге 90-жылдары кіріскен болатын. Ұзақ жылдар бойы тоқтап қалған  кәсіпорын былтырдан бастап қайтадан іске қосылды. Шағын кәсіпорынға қытайлық инвестор қаржы салып, қазір қой жүні қайта өңдеуден өткізіліп жатыр.

Алматы облысындағы «Ақсұңқар -2030»  кәсіпорынымен жасалған келісім шарт бойынша бүгінгі күнге дейін «Дерикар» ЖШС 250 тонна қой жүнін өңдеуден өткізіп, шетелге сатуға дайындап отыр. Қой жүні Қытайға экспортталмақ.

-Біз өндіріс көлемін одан әрі ұлғайтамыз. Қой өсірумен айналысатын Тарбағатай, Аягөз, Үржар, Жарма, Күршім сияқты ауданымызға жақын орналасқан өңірлерден дайындау пункттерін ашамыз,- дейді Абай ауданының әкімі Жарқынбек Байсабыров.

Абай ауданында асыл тұқымды қой шаруашылықтарының үлесі   облыс деңгейіндегі орташа  көлемнен жоғары. Ауданда негізінен қойдың Еділбай тұқымы өсіріліп келеді.