Шығыс Қазақстан облысында бір күнде екі бірдей автокөлік аударылып, 3 адам зардап шекті, деп хабарлайды Altaynews.kz тілшісі облыстық жол полициясы басқармасының ақпаратына сүйеніп.
Жол сақшыларының айтуынша, Катонқарағай ауданының Солоновка ауылының маңында Ваз-2106 көлігінің 24 жастағы жүргізушісі басқаруға ие бола алмай, темір тұлпарын аударып алған. Жол апатының салдарынан көлік иесі әртүрлі жарақат алыпты.
Тағы бір қайғылы оқиға Таңсық-Ақтоғай жолының 5-шақырымында тіркелді. Тойота Люсида көлігінің қожайыны жылдамдықты шамадан тыс асырамын деп, мәшиненің аударылуына жол берген. Бұл көлік оқиғасында салондағы екі жолаушы зардап шекті.
Жол полициясы қызметкерлерінің мәліметтері бойынша , жыл басынан бері жылдамдықты шамадан тыс асырудың кесірінен 302 жол-көлік апаты тіркеліп, онда 57 адам қайтыс болды, тағы 395 адам жарақат алған. Бұл көрсеткіш өткен жылдың сәйкес уақытымен салыстырғанда жол апаттарының 54 пайызға артқанын көрсетеді.