АҚШ-тың Майами қаласында дзюдо күресінен ардагерлер арасындағы әлем чемпионаты аяқталды.Оған 46 мемлекеттен келген 761 балуан қатысып, түрлі жас ерекшеліктері бойынша жүлдені сарапқа салды, деп хабарлайды Аltaynews.kz тілшісі.

Аталмыш жарыста Қазақстанның туы астында өнер көрсеткен Руслан Сейілханов 100 келі салмақ дәрежесі бойынша белдесіп, бас жүлдені жеңіп алды. Бұл есім жанкүйерлерге жақсы таныс.

Шығыс Қазақстан облысы Ұлан ауданының тумасы тоқсаныншы жылдардың басында еліміздің белді самбошыларының бірі болды. Сейілханов әлем чемпионатында екі мәрте жүлделі орындарды иеленіп, құрлықтық деңгейдегі додаларда қарсылас шақ келтірген жоқ. Әлем кубогы жолындағы жарыста дара шықты. Кейіннен дзюдо күресіне ден қойып, 10 жылға жуық уақыт түрлі халықаралық жарыстарда Қазақ елі намысын абыройлы қорғады. Қандасымыз Азия ойындары мен Азия чемпионаттарында жүлдегер атанып, бірқатар бәсекелерде алдына жан салмады. 1996 жылы Атлантада және 2000 жылы Сиднейде алауы тұтанған Олимпиада ойындарында бақ сынады. Сондай-ақ Руслан қазақ күресінен өткен көптеген дүбірлі додаларда түйе балуан атағын жеңіп алды.

Үлкен спорттан қол үзсе де, Руслан бабын жоғалтқан жоқ. Жасы 40-тан асса да салауатты өмір салтын ұстанып, жаттығу залында тер төгуде. Таяуда ғана Сейілханов «Қазақстан Барысы» додасында күш сынасты. Бұл жарыста оған жүлде бұйырмағанымен, жанкүйерлердің жылы лебізіне бөленді. Ал Майамиде өткен жарыстың бастапқы бәсекелерде қарсыластарын бет қаратпай ұтқан қазақтың өр мінезді ұлы шешуші тұста АҚШ балуаны Питер Аджабактың аяғын көктен келтірді. Сөйтіп, қандасымыз әлем чемпионы атағына қол жеткізді.

Бұл күндері Руслан Сейілханов Өскемен қаласында Кедендік рәсімдеу орталығында бас маман қызметін атқарып жүр.

Сондай-ақ аталмыш жарыста 66 келі салмақта белдескен Мәлік Есенбаев пен аса ауыр салмақта айқасқан Сергей Әлімжанов алтын тұғырға көтерілді.