Сәлеметсіздер ме құрметті радиотыңдаушылар! «Алтайньюс» сайтындағы «Алтай» интернет-радиосының жаңалықтарын тыңдаңыздар.

Шекаралас мемлекеттер Ресейдің Алтай өлкесі, Монғолия, Қытай, Қазақстан арасында «Алтай – алтын таулар» атты туристік экспедиция Зайсанда болып қайтты. Меймандар Зайсан ауданының туристік мүмкіндіктерін, қаланың көрікті жерлерін, тарихи ескерткіштерді, спорт ғимараттарын, атқарылып жатқан игі істерін көріп тамашалады.

Қазақстандық эстрада жұлдыздары Қыдырәлі Болманов пен Қарақат Әбілдина Зырян ауданында болып, концерт қойды. Концерт кезінде қайырымдылық акциясы өткізіліп, одан түскен қаражат осы ауданның тұрғыны Сергей Гамишевті емдеу қорына аударылды

Қазіргі уақытта Курчатов қаласындағы «Буратино» балалар саябағының төңірегіне қоршаулар тұрғызылып, қокыстардан тазартылды. «Туған жерге тағзым» акцияны аясында кәсіпкер Сайлаубек Тұрсынханов өзінің қаражатымен салған балалар алаңын іске қосты

Катонқарағай аудандық кітапханасының ұжымы электрондық каталог жасау жұмысымен айналысуда. Оған облыстық және аудандық бюджеттен қаражат бөлінді және облыстық кітапхана ИРБИС бағдарламасын орнатты. Жаңадан жеті компьютер алынды.

Өскемен қаласында Шығыс Қазақстан облысының 80-жылдығына және облыстық Достық үйінін 20-жылдығына арналған мәдени іс-шара өтті. Этноауылда Бесқарағай ауданы «Башкуль» аудандық татар мәдени орталығы» қоғамдық бірлестігі мен «Асыл әжелер» қазақ фольклорлық тобы концерт қойды.

«Туған жер-алтын бесігім» акциясы аясында Зырян қаласында Зайсан ауданының мәдени күні өтті. Зайсандықтардың жәрмеңке әкелген барлық өнімдері түске дейін толық сатылып бітті. Алаңның екінші жағында құрылған сахна төрінде зайсандық «Айнакөл» халықтық ән-би ансамблі, аудандық саз мектебінің, «Жалында» би тобының өнерпаздары өз өнерлерін паш етті.