Үстіміздегі жылдың 27 шілдесі мен 12 тамызы аралығында Лондонда өтетін ХХХ жазғы Олимпиада ойындарына қатысты кейбір қызықты ақпараттар көпшілікке мәлім болды.
«Аламан» ұлттық спорт порталының мәліметінше, алқызыл алау 10 мамырда, әдеттегідей Олимп тауында тұтанады. Ол әуелі Грекияның бірқатар аумағын аралап, 18 мамырда арнайы рейспен Ұлыбританиядағы «Culdrose» әскери-теңіз базасына жеткізіледі. Одан кейін алау Англия, Уэльс, Шотландия және Солтүстік Ирландия қалаларын 70 күн бойы шарлайды. Бұл ретте оны 1018 елді мекендер арқылы алып өту көзделуде. Олардың арасында әсем қалалар, жақын маңда орналасқан аралдар, тарихи мекендер, таңғажайып нысандар мен табиғат аясындағы жерлердің назардан тыс қалмауына баса назар аударылған. Бұл шараға мыңнан аса ресми тұлғалар, спортшылар, журналистер және жергілікті тұрғындар қатысады. Алау белгіленген жерлерге ұшақ, кеме, пойыз, трамвай, қанат жолдары, әуе шары, мотоцикл және велосипед арқылы жеткізіледі. Түрлі салада қызмет етіп жүрген 8 мың адам алауды ұстап шығу құрметіне ие болды. Ең соңында ол Лондонның барлық аудандарын шарлап, Темза өзені бойымен Хэмптон-корт сарайы арқылы 27 шілдеде Олимпиада ойындарының ашылу салтанаты өтетін алып стадионға келеді.