Самар ауданындағы Палатцы – Қараш – Қарақол – Песчанка автожолы жөндеуді қажет етеді. Дегенмен жергілікті билік өкілдері жолды жөндейміз деген уәделерін әлі күнге дейін орындамай келеді, деп хабарлайды Altainews.kz тілшісі.

Биыл Шығыс Қазақстан облысында Жол жылы деп жарияланды. Алайда, кейбір аудандар оларды жөндеуге асығар емес.

Самар ауданындағы әрқайсысында 150 шақты адам тұратын Қараш, Қарақол және Песчанка ауылдарының жұрты елді мекендеріне апаратын автожолдардың жоқтығына шағымдануда.

Олардың айтуынша, екі жыл бұрын жағдай өзгереді деп уәде берілген. Сонымен қатар жолдың 18 сантиметрге көтеріліп, тегістелетіні де айтылған. Алайда уәде сол күйі орындалмай жатыр.

Биыл жағдай ушыға түсті, көктемгі тасқын салдарынан жолдарды бірнеше рет су шайды. Қазір тұрғындардың айтуынша, жолдардың жағдайы мәз емес.

Сонымен қатар жолдар жақсарса, оңтүстіктен қоныс аударушылардың да осында келетіні анық. Ал көпбалалы отбасылар – ауылдың гүлденуінің, оның болашағының кепілі.

Тұрғындар ауылдық және аудандық әкімдіктерге бірнеше рет жүгінген. Тіпті жиналыс өткізіліп, онда жергілікті билік өкілдері көктемде жолдарды жөндеуге кірісеміз деп уәде де беріпті. Шілде болды, еш қозғалыс жоқ.

Жағдайды анықтап, жолдардың қашан жөнделетінін білу үшін Самар ауданына Altainews медиа-орталығының түсірілім тобы барды.

Автожолға толыққанды жөндеу жүргізуге ауданның мүмкіндігі жоқ. Олар облыстық жолаушылар көлігі және автомобиль жолдары басқармасынан қаржы бөлуді сұрап отыр.

Altainews.kz тілшілері осы жағдайды бақылауда ұстап, аталған ауылдардың тұрғындарымен байланыста болады.