Биыл Ұлы Жеңістің 80 жылдығы аталып өтпек. Осыған орай еліміздің түкпір-түкпірінде түрлі патриоттық шаралар ұйымдастырылып жатыр. Солардың бірі – «Шығыс» өңірлік қолбасшылығына қарасты 5518 әскери бөлімінде бастау алған ерекше челлендж, деп хабарлайды Altainews.kz тілшісі.

Өскемен қаласындағы бөлім сарбаздары бұл бастаманы жандандыру мақсатында бес шақырымдық қашықтықты жүгіріп өтті. Мақсат – ел қорғау борышының маңызын сезіну, жауынгерлік рухты көтеру, тарихи жадымызды жаңғыртып, жас буынды отансүйгіштікке тәрбиелеу.

Шара барысында әскери бөлімнің жеке құрамы сап түзеп, ұйымшылдықпен белгіленген қашықтықты еңсерді. Жеңіл жүгіріспен рухты көтерген ұрандар іс-шараның мазмұнын аша түсті. Бұл арқылы жауынгерлер ерлік пен батырлықтың өлшемі болған ардагерлерге тағзым етіп, олардың жанқиярлық ерлігін ұлықтады.

Іс-шара челлендж ретінде жалғасып, Ұлттық ұлан құрамындағы Павлодар қаласындағы 5512 әскери бөліміне жолданды. Осылайша, бұл патриоттық эстафета басқа әскери құрылымдар арасында кеңінен таралып, елге деген сүйіспеншілік пен жауынгерлік рухтың жарқын үлгісіне айналмақ.

Фото: «Шығыс» өңірлік қолбасшылығы