Шығыс Қазақстан облысында теория мен өндірістік тәжірибені ұштастыра отырып маман даярлау – дуальді оқыту жүйесі кеңінен қанат жаюда. Бұл жүйеге өңірдегі кәсіпорындар белсенді қатысып, студенттердің мамандықты меңгеріп қана қоймай, өзін жұмыс орнында сенімді сезінуіне де көмектесіп жүр, деп хабарлайды Altainews.kz тілшісі.

Бүгінде облыста дуальді оқыту жүйесіне 28 колледж, 663 кәсіпорын және шамамен 5000 студент тартылған. Облыстық білім басқармасы басшысының орынбасары Алимa Ақылбектің айтуынша, тәжірибе IT, машина жасау, ауыл шаруашылығы мен металлургия салаларын қамтиды. Соңғы он жылда дуальді білім алып жатқан студенттер саны бес есе артқан.

Өндірістік полигондар мен тәжірибе

Облыста алғашқылардың бірі болып дуальді білім беру моделін «Өскемен ЖЭО» ЖШС жанындағы Корпоративтік оқу орталығы енгізген. Мұнда энергетик мамандарды даярлауға қажетті барлық жағдай жасалған: екі ірі оқу полигонында жылу және электр жабдықтары орнатылған. Студенттер тәжірибені білікті шеберлер мен оқытушылардың жетекшілігімен өтеді.

Тігін цехы – болашаққа жолдама

Дуальді оқыту жеңіл өнеркәсіп саласында да нәтижелі қолданылып жүр. «Рауан» өндірістік-коммерциялық кәсіпорны Өскемен технология және сервис колледжімен, сондай-ақ Құмаш Нұрғалиев атындағы колледжбен бірлесе жұмыс істейді. «Тігін өндірісі және киім үлгілеу» мамандығы бойынша оқитын студенттер бірінші курстан бастап кәсіпорынмен келісімшартқа отырып, цехтарда оқып-үйрене бастайды. Жеті түлек оқуын аяқтағаннан кейін дәл осы жерде жұмысқа орналасқан.

Кәсіпорын өз оқу бағдарламаларын да әзірлеп, студенттерді «WorldSkills» чемпионатына дайындайды.

Нұсқаушы – қарапайым жетекші емес

Дуальді оқытудың басты тұлғасы – нұсқаушы. Қазіргі таңда облыста 149 маман арнайы сертификатталған. Олардың дайындығымен ШҚО кәсіпкерлер палатасы айналысады. Курс барысында тренер-мультипликаторлар өндірістегі оқыту процесін ұйымдастыру, студенттерді ынталандыру, дауларды шешу және командалық жұмысты дамыту тәсілдерін үйретеді.

Курс соңында қатысушылар «Атамекен» ҰКП нұсқаушылар реестрінде тіркелетін ресми сертификат алады.

Өз ісін сеніммен меңгеру маңызды

Жарқын мысал ретінде «Өскемен ЖЭО» қазандық цехының аға машинисі Ернұр Төкешевті айтуға болады. Ол «Кәсіби маман» өңірлік байқауында «Өндірістегі үздік нұсқаушы» номинациясының жеңімпазы атанды.

Өңірлік қолдау мен бағалау

Өскеменде дуальді оқытуды дамыту бойынша дөңгелек үстел өтті. Оған облыстық білім басқармасы, колледждер мен кәсіпорындардың өкілдері қатысты. Жиын барысында қатысушылар қазіргі жетістіктер мен алдағы жоспарларды талқылап, кадр даярлаудағы нұсқаушылар рөлінің маңызын атап өтті.

«Кәсіби маман» байқауының қорытындысы да жария етілді. Жеңімпаздар:

• «Кадр даярлауға қатысушы үздік кәсіпорын» – «Үлбі металлургиялық зауыты» АҚ;

• «Жұмысшы маман даярлаудағы үздік колледж» – Өскемен көпсалалы технологиялық колледжі;

• «Өндірістегі үздік нұсқаушы» – Ернұр Төкешев.

Олар енді республикалық кезеңде өңір намысын қорғайды.

Бүгінде Шығыс Қазақстанда дуальді оқыту жүйесі сенімді түрде дамып келеді. Алайда бұл жетістік – ең алдымен, кәсіби шеберлігі мен жанашырлығымен ерекшеленетін нұсқаушылардың еңбегі. Дәл солардың арқасында өңір кәсіпорындары білікті кадрлармен қамтамасыз етіліп, техникалық мамандық иелері еңбек жолын сенімді бастай алады.

Роксана Глыбова