А.С.Пушкин атындағы Шығыс Қазақстан облыстық кітапханасында ақын, аудармашы, халықаралық «Алаш» әдеби сыйлығының лауреаты, ҚР мәдениет пен ақпарат салаларының үздігі Саят Қамшыгермен «Бұл күз басқа... әдемірек, өзгерек» атты шығармашылық кездесу кеші өтті, деп хабарлайды Altainews.kz тілшісі. 

Саят Қамшыгер 1978 жылы Абай облысы, Жарма ауданы, Кезеңсу ауылында дүниеге келген. Ақын «Сары гүл», «Жүректегі ағыстар», «Жүрегімде жұлдыз бар», «Биші қайыңдар» сынды жыр жинақтарының авторы. 2016 жылдан бастап аударма саласында өнімді еңбек етуде. 

Кездесу барысында башқұрт жазушысы Айгиз Баймұхамедовтан аударған «Тастамашы, ана!», «Ертегісіз өткен балалық», «Көше балалары» атты туындылары туралы айтып өтті. Жастар атынан Динара Алиева мен Еркежан Аманкелдина ақынның өлеңдерін мәнерлеп оқып, өлеңсүйер қауымға ерекше әсер сыйлады. С.Аманжолов атындағы ШҚУ студенттері әке туралы ән шырқап, авторға көкейде жүрген сұрақтарын қойды. Қаланың зиялы қауым өкілдері, мектеп кітапханашылары сөз сөйлеп, Саят Қамшыгердің шығармашылығына ақ жол тіледі. 

Жетім балалардың тағдырын, балалар арасындағы әлімжеттілікті, қоғамдағы отбасылық мәселелерді арқау еткен Саяттың аудармалары Өскемендегі кітапсүйер қауымды бір елең еткізді. Қатысушылар кітаптарына қолтаңба алып, естелік суретке түсті.

Серік Құсанбаев