Алтайдың баурайындағы қасиетті Катонқарағайдың мәдени байлығы мен рухани әлемі Өскемен төрінде айрықша сән-салтанатпен таныстырылып жатыр. «Туған жер – алтын бесігім» жобасы аясында ұйымдастырылған бұл игі шара туған өлке тарихын, табиғатын, тұлғаларын ұлықтауға арналған, деп хабарлайды Altainews.kz тілшісі. 

Мерекелік көрменің шымылдығы Шығыс Қазақстан облыстық филармониясының кең фойесінде түрілді. Мұнда көз тартар түрлі экспозициялар қойылып, көрермен қауым тарихтың сыры терең әлемі мен өнердің сән-салтанатына сапар шекті.

Көрменің інжу-маржаны — «Берел» мемлекеттік тарихи-мәдени музей-қорығының жәдігерлері. Б.з.д. II–I мыңжылдықтарға тән тарихи қазыналар — адам бейнесі бейнеленген әшекейлі белдік шығыршығы, сүйектен жасалған тарақ, бұғы мүйізінен жасалған бұйымдар.

Катонқарағайдың рухани келбеті тек көне мұрамен шектелмейді. Аудандық орталық кітапхана ұсынған көрмеден Оралхан Бөкей, Қалихан Ысқақ, Дидахмет Әшімханұлы, Әлібек Асқаров сынды тау тұлғалы қаламгерлердің сирек кітаптары мен шығармашылық мұралары ерекше орын алды. Әр парағы — туған жерге деген махаббатпен жазылған асыл сөз.

Көңіл толқытар бір сәт — жазушы Оралхан Бөкейдің туған ауылы Шыңғыстайдан жеткізілген үй-музей жәдігерлері. Қарапайым ғана фотоаппарат, сағат, визитка, достықпен жазылған ашық хат — барлығы да қаламгердің тірі рухын сездіріп тұр. Ал сөрелерге қойылған қолжазбалары – сөздің сиқыры мен уақыттың тынысын жеткізгендей.

Көрменің бір бөлігі Катонқарағай ұлттық табиғи паркіне арналды. Шатқал мен шыңды, орман мен өзенді бір арнаға сыйдырған бұл өлке — табиғаттың өзі салған әдемі сурет іспетті.

Катонқарағай – тек табиғатымен емес, жүрегі кең халқы, ашық мінезді жастары арқылы да көңіл баурайды. Мұны ауыл мектебінде қызмет ететін филиппиндік ұстаз Майкл Секарро Напал да айтады.

Кеш соңында қонақтар «Өнер және өр Алтай» атты мерекелік концертті тамашалады. Сахнаға шыққан Катонқарағайдың өнер ұжымдары мен жас таланттары көрерменді ән мен күйге бөлеп, мың бұрылған биімен тәнті етті. Әрбір көрсетілген өнер түрінен туған жерге деген шексіз махаббат көрініс тауып, Алтайдвң биік рухы баурағандай әсер қалдырды.

Мәдени мерекенің алғашқы күні осылайша шабыт пен шаттыққа толы сәттермен қорытындыланып, жиналған жұртшылыққа туған топырақтың қадірін тағы бір еске салды.

Роксана Глыбова

Аударған: Айгүл Базарова 

Фото: Жібек Нұрахмат

Видео: Жалғас Сақадиев