Тарбағатай ауданында ауыл шаруашылығының дамуына әсер ететін негізгі мәселелердің бірі – су тапшылығы. «Қандысу» су қоймасының апаттық жағдайы егістік көлемін азайтып, шаруалардың өнім алу мүмкіндігін шектеп отыр, деп хабарлайды Altainews.kz тілшісі.

Ауданның басты су көзі саналатын «Қандысу» су қоймасы толық су жинау сыйымдылығы 43,7 миллион текше метрді құрайды. Оның негізінде 7000 гектар суармалы жерді игеру жоспарланған болатын. Алайда қойманың апатты жағдайына байланысты су жинау тоқтатылып, биыл тек 2000–2500 гектар егістік алқап қана игерілді.

Қазіргі уақытта қойманы қайта жаңғырту (реконструкциялау) жобасы жоспарланып отыр. Жоба толық жүзеге асқан жағдайда аудан көлемінде суармалы егіншілік қайта жанданып, ауыл шаруашылығы өнімдерінің көлемі айтарлықтай артады деп күтілуде.

Сонымен қатар, ауданда жауын-шашын мөлшерінің аздығы да егіншілік мүмкіндігін шектейді. Дегенмен, жергілікті агроөнеркәсіптік құрылымдар су үнемдеуші технологияларды енгізу арқылы мәселені кезең-кезеңімен шешіп келеді.

Мәселен, «Тарбағатай Агро» агроөнеркәсіп кешені жалпы құны 1,4 млрд теңге болатын жобаны жүзеге асыруда. 600 гектар жерге жаңбырлатып суару жүйесі орнатылып, жылына 3600 тоннаға дейін шөп өнімі өндірілмек. Бұл – мал шаруашылығына тұрақты жем-шөп қорын қалыптастыруға мүмкіндік береді.

Бұдан бөлек, «Қызылбұлақ» кооперативі 150 гектар жерге үш жаңбырлатып суару қондырғысын және 40 гектарға тамшылатып суару әдісін енгізуде. Ал «ALUA CORPORATION» және «Қайқы» кооперативтері де жаңбырлатып суару құрылғыларын орнатып, егістік алқаптарды тиімді игеріп отыр.

Жалпы, бұл жобалар ауыл шаруашылығында суды тиімді пайдалану, заманауи технологияларды енгізу және ауданның агроөнеркәсіптік әлеуетін арттыруға бағытталған.