Астанада үстел теннисі бойынша еліміздегі ең ауқымды спорттық оқиғалардың бірі – Қазақстан Республикасы Президентінің Ашық кубогы (President’s Open Cup) өтіп жатыр. Биыл алғаш рет ұйымдастырылған бұл турнир елордадағы «Beeline Arena» спорт кешенінде өтіп, 14 елден келген 300-ден астам спортшыны жинады, деп хабарлайды Altainews.kz тілшісі.

Шығыс Қазақстан облысының спортшылары байрақты бәсекеде тамаша нәтиже көрсетті: Рамазан Рауанұлы 11 жасқа дейінгі (U-11) санатта алтын медаль жеңіп алса, 16 жасқа дейінгі (U-16) категорияда Алиби Шоманов қарсыластарынан басым түсіп, чемпион атанды.

Жас спортшыларды Өскемен қаласындағы олимпиадалық резервтің мамандандырылған облыстық балалар мен жасөспірімдер спорт мектебінің бапкерлері — Евгений Груздов пен Сергей Коновалов дайындаған.

Турнир қатысушылары жарыстың ұйымдастырылу деңгейіне жоғары баға беріп, оны әлем чемпионаттарымен салыстырды. Балалар үшін барлық жағдай жасалған. Ойын алаңдары, кәсіби үстелдер, телетрансляциялар мен демалыс аймақтары бар.

Айта кетсек, Қазақстан Республикасы Президентінің Ашық кубогын Nomad Table Tennis Academy ҚР Туризм және спорт министрлігі мен Қазақстан үстел теннисі федерациясының қолдауымен ұйымдастырды. Турнирдің бас демеушілері — Aspan Holding және VD Stroy Engineering компаниялары. Жалпы жүлде қоры — 115 000 АҚШ доллары.

Меруерт Бахтиярова