Өскемен қаласында білім мен ғылым саласының мамандары «Жоғары білім берудегі сапа мәдениеті» атты республикалық семинарда бас қосты. Мазмұнды пікірталасқа, тәжірибе алмасуға, жаңа көзқарастардың түйісуіне арқау болған шарада білім сапасының мәдениетін арттыру, жасанды интеллектіні оқу процестеріне енгізу жұмыстары талқыланды, деп хабарлайды Altainews.kz тілшісі.

Жиынды ұйымдастырушылар — ҚР Ғылым және жоғары білім министрлігінің Жоғары және жоғары оқу орнынан кейінгі білім комитеті мен Қазақстандағы Erasmus+ ұлттық кеңсесі, сондай-ақ Жоғары білімді реформалау ұлттық сарапшылар тобы (HERE). Жиналған ректорлар, проректорлар, декандар, кафедра меңгерушілері, бағдарлама жетекшілері мен комплаенс-офицерлері еліміздегі білім сапасы мәдениетін халықаралық деңгейге көтеру бағытында тың бастамаларды ортаға салды.

Семинарды ҚР ҒЖБМ Интернационалдандыру басқармасының басшысы, HERE тобының мүшесі Рауза Мендалиева жүргізіп, жиын шымылдығын ЖОО жетекшілері, ҚР ҒЖБМ комитеті және Erasmus+ ұлттық кеңсесінің өкілдері ашты. 

Семинардың алғашқы баяндамасын Astana IT University бірінші проректоры, HERE тобының төрағасы Серік Өмірбаев ұсынды. Ол сапа мәдениетінің мәнін, оның әдіснамалық негіздері мен ілгерілету механизмдерін жан-жақты түсіндіріп, білім беру ұйымдарының ішкі мәдениетіне, академиялық адалдық пен басқару шешімдерінің ашықтығына басымдық берілмейінше, сапаның шынайы қалыптаспайтынын атап өтті. 

Семинар барысында жоғары білім берудегі сапа мәдениетінің әдіснамалық негіздері мен оны ілгерілету тетіктері жан-жақты талқыланды. Білім беру бағдарламаларын әзірлеу сапасын арттыру жолдары, емтихан сессияларын әділ ұйымдастыру тәжірибелері және ғылыми еңбектерде академиялық адалдықты қамтамасыз ету мәселелері көтерілді. Сондай-ақ, инженерлік білім сапасын халықаралық стандарттармен үйлестірудің заманауи тәсілдері, аккредитация органдарына қойылатын жаңа талаптар және студенттік ортадағы сапа мәдениетін нығайту бағыттары қарастырылды. Барлық тақырыптар бір мақсатқа — қазақстандық жоғары білім жүйесін жаңғыртып, сапа мәдениетін күнделікті тәжірибеге айналдыруға үндеді.

Қатысушылар өзара пікір алмасып, жоғары білім сапасын жақсартуға бағытталған ұсыныстарын талқылады. Әр университеттің ішкі тәжірибесінен алынған ойлар мен ұсыныстар ортақ мақсатқа — ұлттық жоғары білім жүйесін халықаралық талаптарға сәйкес дамытуға бағытталды.

– Қасым-Жомарт Кемелұлы Тоқаевтың тапсырмасына сәйкес жасанды интеллект технологиялық процесстерін қарқынды дамыту міндеті қойылды. Білімнің сапасын қамтамасыз ету өте маңызды. Осы мақсатта Erasmus+ ұлттық кеңсесінің, Италия, Испания, Германия ғалымдарымен бірге университетіміздің қабырғасында осындай іс-шара өтіп отыр, - дейді С. Аманжолов атындағы ШҚУ ректоры Мұхтар Төлеген.  

Өскеменде өткен бұл семинар жоғары білім жүйесіндегі сапа мәдениеті туралы ел көлеміндегі маңызды алаңға айналды. Кәсіби диалог бүгінгі күннің өзекті мәселелерін ашып қана қоймай, болашаққа бағытталған стратегиялық бағдарларды айқындады.

Айдос Мырзахметов
Видео: Жәнібек Ырысбай
Фото: Жібек Нұрахмет, Артем Жигулин