Сәрсен Аманжолов атындағы Шығыс Қазақстан университетінде саяси қуғын-сүргін және ашаршылық құрбандарын еске алу күніне арналған «Тарихтан тағылым – өткенге тағзым» халықаралық жобасы аясында «Қағазда қалған халықтың қайғысы» тақырыбында тарихшы-өлкетанушылар форумы өтті.

Шараға РҒА СБ Тарих институтының, ШҚУ ғалымдары, облыстық Цифрландыру және архивтер басқармасының мемлекеттік архив қызметкерлері, саяси қуғын-сүргін құрбандарын толық ақтау жөніндегі өңірлік комиссияның жұмыс топтарының басшылары мен мүшелері қатысты, деп хабарлайды Altaynews тілшісі.

 Естеріңізде болса, ел Президенті 2020 жылы «Саяси қуғын-сүргін құрбандарын толық ақтау жөніндегі мемлекеттік комиссия туралы» Жарлыққа қол қойған болатын.

  Конференцияға қатысушылар Б.Мамраев атындағы ғылыми кітапхана ұйымдастырған «Тарихтан тағылым – өткенге тағзым» кітаптар көрмесімен танысып, сондай-ақ ШҚО цифрландыру және архивтер басқармасының «Мемлекеттік мұрағат» КММ ұсынған «Память, которой не будет забвенья» бейнекөрсетілімін тамашалады.

Шара барысында белгілі қазақстандық телеоператор Саид Фазыловтың «Восхождение в бессмертие» деректі фильмі ұсынылды. Форумда мұрағаттық зерттеулерді дамытудың өзекті мәселелері, тарихи зерттеулердегі цифрлық технологияларды дамытудың қазіргі жағдайы мен перспективалары талқыланды.