Өскемендегі трамвай депосын жөндеу жұмыстары аяқталуға жақын
Облыс орталығында әбден тозығы жетіп, қабырғасы қақыраған трамвай депосында жөндеу жұмыстары жүргізіліп жатыр.
1972 жылы салынған ғимаратқа бұған дейін жөндеу жұмыстары жүгізіліп көрмепті. Бұл туралы кәсіпорынға жұмыс сапарымен барған қала әкімі Жақсылық Омар айтты, деп хабарлайды Altaynews тілшісі.
Шаhар басшысының айтуынша, кәсіпорын нысаны жөнделмеуінің де өзіндік себептері бар. Әу баста мемлекет меншігінде болған парк біраз уақыттан кейін жеке меншікке өткен. Ұзақ сот процестерінен кейін, 4 жыл бұрын мемлекетке қайта қайтарылды.
- Негізінен қаладағы трамвай паркінде шешілуі керек мәселе жетерлік. Оның бірі – тозығы жеткен ғимарат болатын. Сондықтан күрделі жөндеу жүргізуге шешім қабылдаған едік. Басқа мәселелер де біртіндеп шешіліп келеді. 4 қоғамдық көлік жаңартылып, 3500-ге жуық рельстер ауыстырылды. Жұмысшылардың да жалақысын өсірдік, - дейді қала әкімі.
Еліміз бойынша үш қалада ғана трамвай жүретіні белгілі. Облыс орталығындағы трамвайлар өзін-өзі ақтайтын қоғамдық көлік түріне жатады.
- Трамвай – экологиялық таза көлік түрі. Екіншіден, қала тұрғындарының 30% - ы осы қоғамдық көлікпен қатынайды. Әсіресе, өндіріс орындарында қызмет ететін тұрғындардың барлығы дерлік осы трамваймен жүреді, - деп түсіндірді Жақсылық Мұқашұлы.
Оқи отырыңыз
