Халықаралық авторалли қатысушылары Өскеменге жетті
Прага-Өскемен бағытындағы халықаралық авторалли өз мәресіне жетті.
13 шілде күні Прагадан шыққан қатысушылар бүгін Өскеменге жетті, деп хабарлайды Altainews.kz тілшісі.
Әлемнің 17 елінен жиналған қатысушылар Шығыстың бас шаһарына жету үшін 12 мың шақырым жол жүріп өткен.
- Бұл жай автошеру ғана емес, қызықты естеліктерге толы саяхат болды. Көп елдің дәстүрімен, мәдениетімен таныстық. Қазақстанға алғаш келуіміз, бұл жақтың табиғаты мен қонақжацлығына тәнті болдық, - дейді Италиядан келген автошеруге қатысушы Алессия Томмаси.
Ал британдық қатысушылар алдағы уақытта саяхаттау үшін Қазақстанға қайта оралатындықтарын айтады.
ШҚО туристік-ақпараттық орталығы басшысының орынбасары Талғат Дәулетовтың айтуынша, автошеруді 50 көлік пен 120 қатысушы бастаған. Алайда ұзақ та, күрделі жолға шыдаған қатысушылар ғана мәреге жеткен.
- Біздің негізгі мақсат - еліміздің әсем табиғатын, қонақжайлығын көпшілікке паш ету. Мәреге жету сызығы Өскемен қаласы болып белгіленгеніне шын қуаныштымыз. Бұл шарадан қатысушылардың әрқайсы 900 фунт стерлинг көлемінде үлес қосқан, ол халықаралық қайырымдылық қорларына жіберілді, – деп атап өтті Талғат Дәулетов.
Шара соңында қатысушыларға естелік сыйлықтар табыс етілді.
Фото: Аяужан Утеулинова
Оқи отырыңыз
