Өскемен жұртшылығы «Котлован» деп атап кеткен жағалаудан 200 қап қоқыс жиналды, деп хабарлайды Altainews.kz тілшісі.

Шығыста «Таза Қазақстан» экологиялық акциясы аясында өзен-көлдердің жағасын тазалау жалғасып жатыр. Бүгін шаһар тұрғындарының сүйікті демалыс орнына айналған «Котлован» маңайы тазартылды. Жағалау маңындағы қоқыстарды жинауға жиыны 70-ке жуық адам қатысты. Олардың ішінде жуықта ғана «Miss Оskemen - 2024» сұлулық байқауының жеңімпазы атанған ару да бар.

Облыс орталығында 100-ден астам эко-шара өтті. Акция басталғалы 492 аумақ тазаланып, 3871 шаршы метр қоқыс шығарылды. "Қазақстан" тауында 500 көшет егілді. Игі шараға шаһар тұрғындары белсене қатысуда.

Естеріңізде болса, осыдан біраз уақыт бұрын өңір басшысы Ермек Көшербаев, әлі жабдықталмаған жағажайдың қауіпсіздігін қамтамасыз етуді қалалық әкімдікке міндеттеген болатын. Бүгінде су қоймаларындағы жағдайды жақсарту мақсатында ауқымды жобалар дайындалуда.

Экоакцияны ұйымдастырушылар көктемде басталған экологиялық акция алғашқы қар түскенше жалғасады деп отыр.

Балауса Қожаева