Жаңа туған сәби әлжуаз болып келеді. Ал шала туған нәрестеге тіпті үп еткен желдің өзі әсер етпей қоймайды. Ата-бабамыз кезінде мұндай сәбилерді тымаққа салып баптаса, қазір оның орнын кювездер алмастырған. Алайда жылы киімнің маңызы әлі жойыла қойған жоқ. 
Қазіргі таңда арнайы жиынтық тоқып, ұсынатын ұйымдардың да пайдасы зор. Мерзімінен ерте дүниеге келген сәбилерге киім, ойыншық тоқып, жылу сыйлаумен айналысып жүрген ұйымның бірі — “28 ілмек”. Аты айтып тұрғандай, мұндағы киімдер тоқу тәсілімен жасалады. Клуб елімізде 2012 жылы ашылған. Ал 2014 жылы біздің облыста да қызмет ете бастады. Қор еліміздің көптеген қалаларында ашылып, перзентханаларды жиынтықпен қамтамасыз етіп келеді, деп хабарлайды Altaynews тілшісі.
2017 жылы «28 ілмек» қоры ҚР Денсаулық сақтау саласына қосқан үлесі үшін «Алтын жүрек» сыйлығының лауреаты атанды. Қазақстан қалаларынан тыс қор Қырғызстан, Өзбекстан, Латвия, Ресей, Грузия сынды 12 елде ашылып, еріктілер ондағы балаларға мейірім шуағын шашып жүр. 
Айы-күні жетпей, ерте туған нәрестелер салмағы мен мерзіміне байланысты әртүрлі күтімді қажет етеді. Арнайы кювездердегі температура мен ылғалдылық ана жатырына барынша ұқсас күйге келтіріледі. 
Бірақ нәрестенің аман жетілуі үшін жүннен тоқылатын жиынтықтың да маңызы айтулы. Шала туған шақалақтың терісі жұқа әрі тым нәзік, тыныс алуы нашар. Мұндай сәбилер ұзақ ұйықтап кеткенде, жүннен тоқылған киім бойға жылу таратып қана қоймай, денесін тітіркендіріп, қозғалысқа түсіреді. Қимылдағаннан кейін қан айналымы жақсарып, бірден ұйықтап кетпейді. Яғни киім тыныс алу мен салмақ қосуға әсер етеді. 
Тоқитын жиынтыққа қоятын талап пен өлшемдік шектеуі бар. Жиынтық құрамына бас киім, кеудеше, шұлық, көрпеше және ойыншық-комфортер кіреді. Арнайы киім тек 100% жүннен тоқылуы тиіс. Сонымен қатар клуб мүшелері жіп таңдарда түс терапиясын ескеріп, ашық реңктерді таңдауға тырысатынын айтады. Ал жалғанған катетер мен жабдықтарға сәбидің қолы тиіп кетпес үшін ұсынылатын ойыншық таза мақтадан жасалуы қажет. 
Өлшемдік шектеу реті баланың бойы мен салмағына байланысты бөлінеді. Мерзімінен ерте туған сәбилердің салмағы аз, бойы кішкентай болатындықтан киім оларға шақтап тоқылады. 

 
Қазіргі кезде клубқа әртүрлі салада еңбек ететін 35-тен 70 жасқа дейінгі 34 адам мүше болып отыр. Оның ішінде 10 ерікті тоқуға асқан құштарлық танытып, белсенді атсалысып жүрген көрінеді. Мұнда клуб мүшелерін «пері» деп атайды. Клуб ашылғалы бері «перілер» 5 мыңнан астам жиынтық тоқып, облыстық перинаталдық орталыққа табыстаған. Сонымен қатар Семей қаласында бөлімше ашылған сәтке дейін олар сондағы перзентханаларды да қамтып келген. 
Жоғарыда аталғандай, қорда түрлі жастағы, сан салада қызмет ететін, діні мен ұлты бөлек жандардың басы тоғысқан. Бәрінің басын бір жерге қосқан дүние – өзгеге көмек қолын созу ниеті мен тоқу қабілеті. Клуб үйлестірушісінің міндетін уақытша атқарушы Елена Меринова – энергетика саласын игерген маман, ал 50 жастағы Шемонаиха тұрғыны Наталья Онникова сорғы станциясында машинист қызметін атқарады. Қолы қалт еткенде бізі мен жібін тастамайтын тоқымашылар бәрінен бұрын уақыттың тапшылығы қинайтынын айтады. Алайда адамның өзгеге пайдамды тигіземін деген ниеті мен жігері болса, «киіз қазық та жерге кіреді» дейді.

 
Өскемендегі клубтың ашылуының өз хикаясы, түрткі болған жеке себебі бар. Бұрынғы үйлестіруші, оның ашылуына себепкер болған Мадина Юсубалиева әлеуметтік желіде клубтың негізін қалаған атақты журналист Карла Нұрдың оқиғасын оқып, қызығушылығы пайда болған екен. Сол сәттен клубтың тарихы бастау алды. Ықыласы жетелеп, Карла Нұрдың рұқсатын алып, қордың жұмысын жүргізу тәртібін мұқият зерттегеннен кейін Мадина өзінің үш құрбысымен бірлесе іс бастап, үйде жиынтық тоқуға кіріседі. Төртеулеп жүріп құрбылар орта есеппен айына 18 шақты жиынтық тоқып, өткізетін. Алғашқы жиынтықтарды киген егіз сәбилерді кездестірген шақты Мадина әлі күнге дейін сүйсіне еске алады. Бұл кездесу бірнеше жылдан кейін, қиын күндер артта қалған кезде болған.  
Бүлдіршіндер клубтың кезекті бір жиынына қатысқан шақта ғана өздері айналысып жүрген істің, жәрдемнің қаншалықты уақтылы және маңызды екенін түсінгендей болғанын жасырмайды. Осылай төрт құрбының лаулаған жалыны мен мұқалмас жігерінің арқасында жалғасқан қайырымдылық ұйымы кейін өзге де мейірім сыйласам деушілердің назарын аударып, қатар толыға бастаған. Облыс тұрғындарынан бөлек, тіпті қаладағы тамақтану орындарының бірі ниет білдіріп, ай сайынғы кездесуді өткізетін орынды тегін ұсыныпты. Осының арқасында жергілікті газеттердің бірінде хабарлама жарияланып, аймақ жұртын басқосудың нақты орны мен уақыты жайлы ақпараттандыру мүмкіндігіне ие болған-ды.  Газеттегі үндеуді ескерусіз қалдырмаған жандар көптеп келген екен. Қатарға қосылған “перілер” қолынан келген ісімен қолғабыс еткен. Тоқуға машықтанғандары жиынтықтардың уақытылы жөнелтілуімен айналысса, өзгесі сапалы шикізат сатып алу үшін қала кезіп, клуб есебін түгендеп отырған. Ал координаторға жүктелген басты міндет – киімге қажетті жүнді сатып алатын қаражат табу. Қордың тұрақты демеушілері жоқ, сол себепті Мадина көбінде өз ақшасын салып отырған. Тек үйлестіруші ғана емес, басқа еріктілер мен жағдайға бейжай қарамаған өзге азаматтар да жеке қаражаттарын еш өтеусіз, қайтарымсыз қайырымдылыққа бағыштаған. 
Клуб жұмысына қызыққандар арасында жастардың да саны жеткілікті. Алғаш ашылғаннан бері іске кіріскен бірнеше бойжеткен әлі де өз үлесін қосып келеді. Одан бөлек, қайырымдылық мақсатында құрылған ұжымның бір бөлшегі болуға кезінде жасөспірімдер де ұмтылған. Мадина Юсубалиева кей адамдар бұл клубты тоқыма, қолөнер үйірмесі типтес ұжым, қыз балалардың уақыт өткізетін бір ермегі көретінін жасырмайды. Ал, шынтуайтына келгенде, “28 ілмек” – қайырымдылық, ізгілік нұрын шашатын орта, осы мақсатты тұсбағар етіп таңдаған жандардың жәннаты. “28 ілмек” – әр жанға адамгершілік парызын орындауға мүмкіндік беретін киелі жолдың бірі. Ең бастысы, мұнда гендерлік бөлініс жоқ, яғни ер не әйел деп шеттетпестен, есігін қаққан тоқымашылардың бәрін қабылдайды.