Талдықорған – Өскемен автожолының реконструкциясы аяқталуға жақын
Фото: depositphotos.com
Жетісу облысының аумағынан өтетін Талдықорған – Өскемен автожолының 314 шақырымы жаңартылуда. Бұл жобаның реконструкциясы 2019 жылы басталған, деп хабарлайды Altainews.kz тілшісі Көлік министрлігіне сілтеме жасап.
Реконструкция нәтижесінде автожолдың техникалық параметрлері жақсарды: 32 шақырымы бірінші техникалық санатқа ауыстырылып, 282 шақырымдық бөлігі екінші техникалық санатқа ауыстырылды, мұнда екі жолақтың ені 9 метрге дейін кеңейтілді. Сонымен қатар 27 автомобиль көпірі салынды, 350-ден астам су өткізгіш құбыр төселді, 1500-ден астам шам тірегі орнатылды, жарықтандыру жұмыстары жалғасуда.
Жол бойына мыңдаған метрлік қоршаулар орнатылды, 2 мың жол белгісі қойылуда. Бұрын бұл учаскеден өтуге 6 сағат уақыт кетсе, реконструкциядан кейін жол жүру уақыты 3 сағатқа қысқармақ.
Бүгінде барлық негізгі жұмыстар аяқталып, жол жиектерін нығайту, көгалдандыру және абаттандыру жұмыстары жүргізілуде.