Облыс еріктілері жаппай бұқаралық форумдар кезінде кезекші ретінде, демалу орындары мен туристік маршруттарда қауіпсіздікті қадағалаушы ретінде құтқарушыларға көмектеседі. Сонымен қатар ниет білдірген азаматтарға алғашқы көмек көрсету дағдыларын үйретіп, психологиялық қолдау көрсетеді және түрлі ТЖ кезіндегі әрекет ережелерін түсіндіреді.

Аталған дағдыларды меңгеру үшін еріктілер де арнайы дайындықтан өтеді, деп хабарлайды Altaynews тілшісі.

Төтенше жағдай кезінде еріктілер өздері зардап шекпес үшін және іс-қимыл ережелерін азаматтарға сауатты жеткізуі үшін біршама ақпарат игеруі қажет.

Осыған байланысты ШҚО ТЖД Азаматтық қорғаныс орталығының базасында өрт қауіпсіздігі пәндері, жарақат алған адамға алғашқы көмек көрсету, іздестіру қызметі және төтенше жағдайлар кезінде азаматтарды қорғау тақырыптары бойынша сабақ өтті.

Еріктілер де төтенше жағдайда көмек көрсететін қызметкерлердің жұмысы күрделі екендігіне көз жеткізді. 

Дайындық аяқталғаннан кейін 20-дан астам ерікті сертификатқа ие болды.