ТЖД кәсіпорындар қызметкерлерін оқытты – ШҚО
Фото: gov.kz
ШҚО ТЖД кәсіпорындар қызметкерлеріне төтенше жағдайларға дайын болуды үйретеді. Осы шара шеңберінде ШҚО ТЖД мамандары «Казцинк» ЖШС қызметкерлерін оқытты.
Сабақ барысында тыңдаушыларға ҚР Азаматтық қорғаныс туралы заңнамасы мен ел және облыс аумағында болуы мүмкін төтенше жағдайлар түсіндірілді. Дәріс алушылар теориялық білім алып қана қоймай, оны іс жүзінде шыңдай алды, деп хабарлайды Altaynews тілшісі.
ТЖД мамандары оқу тақырыптарының ішінде жер сілкінісі, өрт кезіндегі, химиялық қауіпті нысандағы апат кезіндегі қауіпсіздік шараларына және төтенше жағдай кезінде зардап шеккендерге алғашқы көмек көрсету бағытына басымдық берген.
– Сабақты өткізу кезінде практикалық дағдыларға ерекше көңіл бөлінеді. Тыңдаушылармен өрт сөндіру және сейсмикалық жаттығулар өткіздік, олар алғашқы өрт сөндіру құралдарын қолдануды үйренді, манекенде медициналық дайындық бойынша алған білімді нығайтты. Адам өз дағдыларын көрсеткен кезде біз оның материалды қаншалықты жақсы меңгергені туралы толық түсінікке ие боламыз, – деді Азаматтық қорғаныс басқармасының аға офицері Алмас Байжуминов.
Оқытудан өткен қызметкерлер тест тапсырып, сертификат алды.
Оқи отырыңыз
