13-14 желтоқсанда Риддер тұрғындары автобустардың жұмысына шағымданған болатын. Ал кеше, 15 желтоқсанда барлық автобус желіге қайта шықты, деп хабарлайды Аltaynews.kz тілшісі.

- Ауа температурасы 38 градус төменге жетіп, қатты аязға тұрғандықтан, кейбір тасымалдаушылардың жанармайы қатып қалды, - деп түсіндірді Риддер.қалалық тұрғын үй-коммуналдық шаруашылық, жолаушылар көлігі және автомобиль жолдары бөлімі басшысының орынбасары Рауан Құрметұлы.  – Бүгінде барлық 12 бағыт та техникамен қамтамасыз етіліп, өз жұмыстарын толық көлемде атқаруда.

Бұл мәселені қала билігі қазір ерекше бақылауда ұстап отыр.

– Соңғы кездері автобустар жиі жүре бастады, бірақ ауа райына байланысты дизельдік отынның қатып қалу жағдайлары бар екенін түсіну керек. Жалпы қазір 18-ші және 12-ші бағыттағы автобустар жақсы жүріп жатыр. Бүгін аялдамада бес-ақ минут қана тұрып, күттім, - деп бөлісті 12-ші маршруттың жолаушысы Әлия Қапесова.

Еске салайық, бұған дейін Риддер қаласының әкімі Дәулет Батырбаев өңірлік коммуникациялар қызметінде өткен брифингте маршруттық автобустарды шығарудың кешігуіне ауа температурасының төмендеуі себеп деп айтқан болатын. Сондай-ақ, қала әкімі тасымалдаушы "КазАвтоЛайн" ЖШС-мен автобус паркі ғимаратын қалпына келтіру туралы келісім жасалғанын және қалпына келтіру жұмыстары аяқталған соң автобустардың жолаушыларды тасымалдауында еш қиындық туындамайтынын атап өтті.