Д.Серікбаев атындағы Шығыс Қазақстан техникалық университеті аға буынға арналған «Күміс университет» жобасын жүзеге асырып жатыр.

Жобаның мақсаты - егде жастағы адамдардың өмір сүру сапасы мен әлеуметтік белсенділігін арттыру. 60 жастан асқан кез келген азамат «Күміс университеттің» тыңдаушысы болып, өзіне ұнайтын курсты таңдай алады, деп хабарлайды Altainews.kz тілшісі.

Мәселен, Цифрлық технологиялар және жасанды интеллект мектебінің оқытушылары Мадина Рақышева мен Галина Попова аға буынға электрондық портал сервистерімен жұмыс істеуге, дәрігерге онлайн жазылуға, Telegram, Facebook және басқа платформалармен жұмыс жасауға көмектеседі.

Ал құқықтық және қаржылық сауаттылық курстарын жүргізетін заң ғылымдарының кандидаты Татьяна Сидоренко қарапайым іс жүргізу құжаттарын өз бетінше толтыруды, сондай-ақ, мемлекеттік органдарға және басқа да ұйымдарға интернет-ресурстар арқылы жүгінуге үйретеді.

Тілдік құзыреттілік орталығының оқытушылары Әлия Бакиева, Фарида Байбатанова, Галина Михайлова, Елена Попкованың көмегімен зейнеткерлер қазақ тілі және ағылшын тілі бағдарламалары бойынша курстардан өтеді.

Денсаулық және спорт орталығының нұсқаушысы Дарья Альтемирова тыңдаушыларға «Аға буынға арналған фитнес» курсы ерекше ұнайтындығын атап өтті.

Айжанат Бақытқызы

Фото: Д.Серікбаев атындағы ШҚТУ