«Дарын» сауықтыру лагерінде есірткіге қарсы акция өтті
«AMANAT» партиясы жанындағы «Жастар Рухы» АҚ ШҚОФ пен ШҚО ПД есірткі қылмысымен күрес басқармасы бірлесіп, «Мен есірткісіз болашақты қолдаймын» рефераттар байқауын ұйымдастырды, деп Altainews.kz тілшісі.
Шараның мақсаты - жастарға кез келген психоактивті заттардың адамның физикалық және психологиялық денсаулығына зиянын түсіндіріп, салауатты өмір салтын насихаттап, құқықбұзушылықтардың алдын алу.
Лагерьге келген 20 бала реферат жазып, байқауға қатысқан.
- Тақырып аясында оқушылар мемлекеттік деңгейде, қоғамдық-әлеуметтік ортада жүзеге асыруға болатын ұсыныстарын ортаға салды, - деді ШҚО ПД есірткі қылмысымен күрес басқармасы басшысының орынбасары Ринат Ықыласов.
Дайындық барысында байқау қатысушылары оқушылар арасында сауалнама жүргізіп, есірткінің адам денсаулығы қаупі жайлы ашық ақпараттарды қолданды.
- Біз «есірткінің кесірі туралы не білесіз?», «оны таратудың жазасы қандай?» деген сынды сұрақтармен 25 адамға сауалнама тараттық. Кейін алынған сауалнамаға талдама жасап, алынған статистиканы рефератта пайдаландық, - деді лагерь тәрбиеленушісі, байқау жүлдегері Валентина Емашова.
Баяндамаларды тыңдаған әділқазылар үздіктерді таңдап, бірнеше номинация бойынша жеңімпаздарды таңдап, марапаттады.
Оқи отырыңыз
