ҚР Қаржы вице-министрі Дәурен Маратұлы Өскемен өнеркәсіптік арматура зауыты мен «Рауан» өндірістік сауда компаниясының жұмысымен танысты, деп хабарлайды Altainews.kz тілшісі.

Өскемен қаласындағы өнеркәсіптік арматура зауыты 2013 жылдан бері ірі өндірістік кәсіпорындарға қажетті материалдарды әзірлеп, жеткізіп келеді. Кәсіпорынның негізгі тұтынушылары — мұнай өндіруші компаниялары мен тұрғын үй-коммуналдық шаруашылықтары.
Кәсіпорын жұмысын бастаған уақыттан бері түрлі мемлекеттік бағдарламалар арқылы несиелік жеңілдіктер мен субсидия түріндегі қолдау алып, өз ісін дамытқан.

Сонымен қатар, Қаржы вице-министрі тек өңірде ғана емес, бүкіл Қазақстан бойынша бірегей «Рауан» өндірістік сауда компаниясының жұмысымен танысты. Бұл компания әлеуметтік бизнес бағытын дамытатын тігін фабрикасы. Әлеуметтік бағдарламалар аясында ол мансап орталықтары арқылы көпбалалы аналарды жұмыспен қамтып қана қоймай, мүмкіндігі шектеулі, төсек тартып жатқан балалар мен ересектерге арналған арнайы киім тігумен айналысады.