«BarS-Arena» - болашақ футболшыларға жаңа алаң
Фото: pexels.com
Өскеменде аяқдопқа айрықша икемі бар балаларға арналған «BarS-Arena» спорт кешені жұмыс істеп тұр. Бүгінде мұнда 450 бала жаттығады. Оның ішінде ерекше балалар да бар, деп хабарлайды Altainews.kz тілшісі.
Аталмыш спорт кешені 2022 жылы ашылған. Онда 3-15 жас аралығындағы балалар мен жасөспірімдер жаттығады.
– Жаттығу кешеніне келушілер жасанды және спорттық линолеум жабыны бар екі алаңда шынығады. Ал демалыс күндері мұнда ерекше балалар жаттығады. Мұндағы басты мақсат – шағын футболдың дамуына үлес қосу, – деді «BarS-Arena» спорт кешенінің негізін қалаушы Эльмира Батырбаева.
Бүгінде бұл орталықта 13 жаттықтырушы еңбек етеді. Мұнда болашақ футболшылар үшін барлық жағдай жасалған.
– Келешекте қазақ елінің намысын әлемдік деңгейдегі футбол жарыстарында қорғайтын мықты спортшы болғым келеді. Осы жаттығу залына келіп жүргеніме бір жарым ай болды. Аз уақыт болса да, футболдағы айла–тәсілдерді меңгеріп алдым, – деді «BarS-Arena» спорт кешенінің тәрбиеленушісі Ілияс Ерболат.
Спорттық паркет төселген футбол алаңын салу мақсатында кәсіпкер банк арқылы несие алған. Ал «Даму» қоры оған несиенің пайыздық мөлшерлемесін субсидиялау арқылы қолдау көрсеткен екен.
- Біздің жаттығу залына жібек маталар комбинаты (КШТ) ықшам ауданынан да балалар келіп, шынығады. Бұл өз кезегінде облыс орталығында спортшыларға арналған мұндай жаттығу алаңдары тапшы екенін көрсетеді, – деді Эльмира Батырбаева.
Нәзікжанды болса да, Эльвира Тұяққызы алдағы уақытта басқа да спорт түрлерін дамытуды жоспарлап отырғанын алға тартты.
Ажар Сағатбекова
Оқи отырыңыз
