Күршім ауданы мәслихатының кезектен тыс сессиясында ауданның жаңа әкімі болып Мейіржан Әлбеков тағайындалды. Оның кандидатурасын депутаттар мен тұрғындарға Шығыс Қазақстан облысының әкімі Ермек Көшербаев ұсынды, деп хабарлайды Altainews.kz тілшісі.  

Өңір басшысы жаңа әкімнің алдында Күршім ауданының инфрақұрылымын, әлеуметтік-экономикалық және туристік салаларын дамыту бойынша ауқымды міндеттер тұрғанын атап өтті.  

Мейіржан Әлбековтің жергілікті өзін-өзі басқару органдарында мол тәжірибесі бар. 2023 жылдың желтоқсанынан бастап Күршім ауданы әкімінің орынбасары қызметін уақытша атқарып, 2024 жыллың ақпан айынан ресми түрде орынбасар лауазымында болды.

Аудандық мәслихат депутаттары алдында сөйлеген сөзінде Ермек Көшербаев жаңа әкімнің кәсібилігі мен жауапкершілігін ерекше атап өтті. Оның айтуынша, Мейіржан Әлбековтің білімі мен тәжірибесі аудан алдында тұрған мәселелерді тиімді шешуге мүмкіндік береді.  

Өз кезегінде Мейіржан Әлбеков көрсетілген сенім үшін алғысын білдіріп, Күршім ауданының дамуына бар күш-жігерін жұмсайтынын айтты. Ол әлеуметтік және экономикалық салаларды дамытуға ерекше назар аударатынын жеткізді.  

Айта кетейік, Мейіржан Әлбеков – Шығыс Қазақстан облысының тумасы. 2011 жылы Семей мемлекеттік педагогикалық университетін, 2015 жылы Т.Қ.Жүргенов атындағы Қазақ ұлттық өнер академиясын, 2021 жылы Алматы экономика және статистика академиясын тәмамдаған.  

Еңбек жолын 2010 жылы бастаған. Әр жылдары «Дарын» МКҚК директоры, мәдениет, тілдерді дамыту, дене шынықтыру және спорт бөлімінің басшысы, ауылдық округ әкімі және Ұлан ауданының Таврия ауылдық округінің әкімі, сондай-ақ Күршім ауданы әкімінің орынбасары қызметтерін атқарған.

Арайлым Орсаринова

Фото: Нелли Петенева