Қазақстан Республикасы Парламент Мәжілісінің депутаттары, «AMANAT» партиясының мүшелері Ерлан Сайыров пен Лұқбек Тумашинов Өскеменде салынып жатқан гематология орталығының құрылыс барысымен танысты. Бұл орталық қан және жүрек-қан тамырлары ауруларын жоғары деңгейде диагностикалау мен емдеуге мүмкіндік беріп, медициналық көмектің сапасын айтарлықтай арттыруды көздейді, деп хабарлайды Altainews.kz  тілшісі.

Республикадағы жалғыз гематологиялық орталықтың құрылысы бірнеше жыл бұрын басталған. Алайда, өткен жылы қаржы тапшылығынан құрылыс тоқтап қалған болатын. Жаңа жыл қарсаңында бұл мәселе шешіліп, қосымша қаражат бөлінген.

Қазіргі таңда нысанда ішкі әрлеу жұмыстары мен жабдықтау процесі жүріп жатыр.

Депутаттар орталықтың өңірдегі медициналық туризмді дамытуға да оң ықпал ететінін ерекше атап өтті. Орталық әлемдік стандарттарға сай жабдықталып, молекула-биологиялық және генетикалық зертханалар, сондай-ақ дің жасушаларын жасанды жағдайда өсіретін зертханалар жұмыс істейді. Бұл халыққа диагностикадан оңалтуға дейін кешенді қызмет ұсынуға мүмкіндік береді. Нысанның жалпы жобалық құны – 71 миллиард теңге.

Айна Ескенқызы

Фото: Аяужан Утеулинова

Видео: Данияр Сагидолдин