Қазақстан Республикасы Ауыл шаруашылығы министрлігінің қолдауымен жоғары сапалы тұқымдарды дамытуға арналған инновациялық орталық құрылмақ. Жоба 2026 жылы Ж. Жиембаев атындағы Қазақ өсімдіктерді қорғау және карантин ғылыми-зерттеу институты базасында жүзеге асады, - деп хабарлайды Altainews.kz тілшісі.

Заманауи жабдықтармен қамтамасыз етілетін орталықта жоғары білікті мамандар жұмыс істейтін болады. Негізгі міндет – ауыл шаруашылығы өнімділігіне қауіп төндіретін патогендермен күрес жүргізу және экологиялық қауіпсіздікті қамтамасыз ету.

Орталық тұқым шаруашылықтарымен тығыз байланыс орнатып, әртүрлі дақылдардың тұқым үлгілерін зерттейді. Жобаның басты мақсаты – 2030 жылға қарай отандық тұқым үлесін 80%-ға дейін жеткізу.

Фитоэкспертизаның инновациялық әдістерін қолдану және тұқымдарды сауықтыру арқылы өнімділік айтарлықтай артпақ. Мамандардың пікірінше, өсімдік ауруларының 70%-ы тұқым арқылы таралатындықтан, олардың сапасын жақсарту – егін шаруашылығындағы басты мәселелердің бірі. Орталықтың жұмысы нәтижесінде ауыл шаруашылығы дақылдарының өнімділігі кемінде 40%-ға артады деп күтілуде.

Бұл бастама елдегі агроөнеркәсіп кешенін дамытуға серпін беріп, отандық тұқым шаруашылығының сапасын жаңа деңгейге көтермек.

Дереккөз: ҚР АШМ