Өскеменде жаңа саябақ аймағы бой көтереді. Ол Ертіс көпірінен Республика алаңына дейін созылмақ. Бұл жобаны қала әкімдігі бастамашылық етті.  Оның мақсаты – тұрғындарға жайлы қоғамдық кеңістік қалыптастыру, деп хабарлайды  Altainews.kz тілшісі.

Көркейту жұмыстары аясында көгалдандыру жүргізіліп, тротуарлар төселеді, жарық шамдары, орындықтар мен шағын сәулет нысандары орнатылады. Жаңа саябақ аймағы әр жастағы тұрғындарға демалыс орны болмақ.  
Шығыс Қазақстан облысының әкімі Нұрымбет Сақтағанов жаңа қоғамдық кеңістіктің қажеттілігін атап өтті. 

Облыс әкімі қала тұрғындарының жайлылығы мен жаяу жүргіншілердің қауіпсіздігіне ерекше мән беру қажет екенін атап өтті. Қазір Назарбаев даңғылында жаяу жүргіншілерге қауіп төндіретін мұз сүңгілерін тазарту жұмыстары жүргізіліп жатыр. Температураның ауытқуына байланысты көпқабатты үйлер мен ғимараттардың шатырында мұз қатпарлары түзіліп, қауіп төндіреді.  
Бұл жұмыс ПИК (пәтер иелері кооперативі), басқару ұйымдары мен қызмет көрсетуші мекемелердің жауапкершілігінде болғанымен, облыс басшылығы да жағдайды бақылауға алды. Шатырларды мұздан тазартумен айналысатын арнайы бригадалар ұйымдастырылды.  
Көркейту жұмыстарының тағы бір маңызды бағыты – көше жарықтандыруын жаңарту. Әуезов көшесінде жаңа жарық шамдары орнатылады, бұл қозғалыс қауіпсіздігін арттырумен қатар, қаланың жайлылығын да қамтамасыз етеді.  

Ержан Әбіш

Фото: Нелли Петенева