"AMANAT" партиясының "Кедергісіз келешек" партиялық жобасы аясында ерекше білім беруге қажеттілігі бар балалар мен жасөспірімдерді тәрбиелеу, жеке тұлға ретінде қалыптастыру және әлеуметтік ортаға бейімдеу мақсатында Тарбағатай ауданында арнайы кабинет ашылды, деп хабарлайды Altainews.kz тілшісі.

Орталықтың басты міндеттері – ерекше балаларға түзету-дамыту көмегін көрсету, оларды оңалту және әлеуметтік бейімдеу бойынша мемлекеттік қызмет ұсыну, жағдайын кешенді зерттеп, жеке дамыту бағдарламасын әзірлеу. Сонымен қатар, ата-аналарға кеңес беру, жалпы білім беретін мекемелердегі педагогтарға әдістемелік қолдау көрсету және заманауи білім беру әдістерін пайдалану қарастырылған.

Мекемеде педагог-психолог, логопед, дефектолог, әлеуметтік педагог, емдік дене шынықтыру және музыкалық ырғақ мамандары қызмет атқарады. Балаларға тегін психологиялық және педагогикалық қолдау көрсетіледі.

«AMANAT» партиясының Тарбағатай аудандық филиалының төрағасы Асқар Боғырбаевтың айтуынша, ерекше балалар үшін қолайлы жағдай жасау – басты міндеттердің бірі. Бұл орталық ерекше қажеттіліктері бар балалар мен олардың ата-аналары үшін үлкен көмек болмақ. Енді олар алысқа бармай-ақ, өз ауданында қажетті түзету-дамыту қызметтерін ала алады. Бұл қоғамның инклюзивті дамуының нақты көрсеткіші.

Орталықта әлеуметтік-тұрмыстық бағдарлау, Монтессори әдістемелік кабинеті, тұзды бөлме, емдік дене шынықтыру, ырғақты музыка, психолог, дефектолог, логопед кабинеттері толық жабдықталып, пайдалануға берілді.

«Тарбағатай ауданының психологиялық-педагогикалық түзеу кабинеті» КММ меңгерушісі Айжан Оразғалиеваның айтуынша, мекеменің басты мақсаты – ерекше білім беруді қажет ететін балаларға сапалы түзету-педагогикалық қолдау көрсету. Әр баланың дамуы үшін жеке бағдарлама әзірленіп, оған кәсіби мамандар көмектеседі. Сонымен қатар, ата-аналарға да қажетті кеңес пен әдістемелік қолдау көрсетіледі. Заманауи жабдықтармен қамтылған бұл орталық ерекше балалардың әлеуметтенуіне, сапалы білім алуына және өмірге бейімделуіне жағдай жасайды.

Қазіргі таңда психологиялық-медициналық-педагогикалық кеңес қорытындысы бойынша мекемеге 117 бала жолданған, оның ішінде 61 бала ата-аналарының өтініші негізінде тұрақты түрде қызмет алуда. Сабақтар қазақ тілінде жүргізіліп, жеке және топтық сабақтар түрінде ұйымдастырылады. Сабақ ұзақтығы баланың жас ерекшелігіне қарай 35-45 минут аралығында өтеді.

Аудан тұрғыны Арайлым Кеңесханованың айтуынша, оның баласының сөйлеуінде кешігулер байқалған, сондай-ақ әлеуметтік ортаға бейімделуде қиындықтар болған. Бұрын қажетті мамандарға қаралу үшін қалаларға баруға тура келсе, қазір өз ауданында осындай орталық ашылып, білікті мамандар балалармен жұмыс істеп жатыр. Бірнеше айдың ішінде баласының тілінде айтарлықтай өзгерістер байқалып, өзіне деген сенімі артқан. Бұл ата-аналар үшін үлкен мүмкіндік.

Тарбағатай ауданында ашылған бұл түзету кабинеті ерекше білім беруге қажеттілігі бар балалар үшін үлкен мүмкіндік. Ол балалардың әлеуметтенуіне, дамуына және сапалы білім алуына ықпал ететін маңызды мекеме болмақ. Бүгінде ерекше балаларға қамқорлық көрсету ел дамуының маңызды бағытына айналды. Мұндай орталықтардың ашылуы қоғамның әлеуметтік жауапкершілігінің жоғарылағанының айқын дәлелі.