Шығыс Қазақстан облысында шөптің жану жағдайлары көбейіп отыр. Тек өткен демалыс күндері ғана ШҚО Төтенше жағдайлар департаментінің мамандары 150-ге жуық өрт оқиғасын жойған, деп хабарлайды Altainews.kz тілшісі ШҚО ТЖД баспасөз қызметіне сілтеме жасап.

Өрттің басым бөлігі ашық далада және саяжай алаптарының маңында тіркелуде. Бұл жағдайлардың негізгі себебі – отты абайсыз пайдалану. Азаматтардың немқұрайлылығы, темекі тұқылын сөндірмей тастау, құрғақ шөпті немесе қоқысты өртеу осындай оқиғаларға себеп болып отыр.

Рұқсат етілмеген от жағу әрекеттері үшін әкімшілік жауапкершілік қарастырылған. ҚР ӘҚБтК 336-бабы бойынша – 20 АЕК мөлшерінде айыппұл салынады; ҚР ӘҚБтК 410-бабы бойынша – ескерту немесе 5 АЕК айыппұл; Егер от жағу әрекеті ауыр зардаптарға әкелсе – ҚР ҚК 204-бабының 2-бөлігіне сәйкес – екі мың АЕК-ке дейін айыппұл, түзету жұмыстары, не 2 жылға дейін бас бостандығын шектеу жазасы тағайындалуы мүмкін.