Әр ұлттың болашағы, оның денсаулығы мықты ұрпағымен өлшенеді. Бүгінде жас ұрпақтың ғылымға деген қызығушылығы тек білім алумен шектелмей, қоғам игілігі үшін пайдалы инновациялық өнімдер жасауға бағытталуда. Осындай игі істің жарқын үлгісін Өскемендегі дарынды балаларға арналған мамандандырылған мектеп-лицей-интернатының 10-сынып оқушылары Азамат Нұрболат пен Аяжан Төкен көрсетті, деп хабарлайды Altainews.kz тілшісі.

Өздерінің ғылыми жетекшілері – биология мұғалімі Динара Мұсабаевамен және С. Аманжолов атындағы Шығыс Қазақстан университеті биология кафедрасының профессоры, биология ғылымының кандидаты Гүлназ Садықановамен бірлесе отырып, олар адам денсаулығына пайдалы биойогурт жасап шықты. Бұл – олардың ғылым жолындағы алғашқы қадамдары ғана емес, сонымен қатар қоғамның денсаулық сақтау саласына қосқан үлесі. 

Зерттеу нәтижесінде топинамбур ұнтағы қосылған бірнеше йогурт өнімі әзірленді. Ғылыми жобада жаңа йогурттың рецептурасы мен технологиясы баяндалады, сондай-ақ өнімнің диабетпен ауыратын адамдарға тигізетін пайдасы талданады.

Топинамбурға жеке тоқталар болсақ, оны кейде «жер алмұрты» деп те атайды, ол – көптеген емдік қасиеттерге ие күнбағыс тектестерге жататын көпжылдық өсімдік. Отаны – Солтүстік Америка. Қазақстан аумағына Қытай арқылы келгендіктен халық арасында «қытай картобы» аталған. Жалпы «Топинамбур» атауы еуропалықтардың осы өсімдікті топинамбо атты үндіс тайпасынан алғаш көріп, егуді үйренгенінен кейін пайда болған екен.

Елімізде сүтті ешкі шаруашылығы баяу дамып келе жатыр. Қазақстанда ешкі сүтінен жасалған сүт өнімдерін өндіру жеткіліксіз және тұтынушылардың талабына сай келмейді. Ұзақ уақыт бойы ешкі сүтінен жасалған сүт өнімдері сауда ұйымдарында тек импорттық орын алатыны белгілі.

Бір қызығы иойогурт жасауда қолданылатын сүтті анықтау үшін оқушылар ешкі және сиыр сүтін салыстырған. Ешкі сүтінде май, ақуыз мөлшері сиыр сүтіне қарағанда көбірек болыпты. Әрі ешкі сүті нәзік сүзбе түзетіні анықталған. Сондықтан өнім жасауға 70% ешкі сүтінің және 30%сиыр сүтінің оңтайлы қоспасы пайдаланылды.

Дарынды оқушылардың ізденісі мен еңбегінің нәтижесінде дүниеге келген биойогурт – инновация мен дәстүрдің үйлесімді тоғысқан үлгісі. Табиғи компоненттерден жасалған иогурт науқастарға ғана емес, барша салауатты өмір салтын ұстанушыларға да нағыз көмекші құрал болмақ. Бұл өнімнің нарыққа шығып, еліміздің денсаулық сақтау жүйесінде өз орнын табуы – оқушылардың арманы ғана емес, шынайы мүмкіндігі. Жастардың осындай жаңашылдыққа бет бұрып, өз білімдерімен қоғам игілігіне қызмет етуі – ұлт болашағының кепілі. Азамат пен Аяжанның еңбегі әрбір жас ғалымға үлгі боларлықтай, ал олардың алғашқы жетістігі – баршамызға ортақ мақтаныш.