Осыған дейін Риддер қаласының маңында дарынды балаларға арналған жыл бойы жұмыс істейтін республикалық лагерь ашу мәселесі көтерілген еді. Қазір осы жобаның орындалуы қандай сатыда екенін облыстық білім басқармасының басшысы Инесса Чернышева өңірлік коммуникациялар қызметінде өткен брифинг барысында айтып берді, - деп хабарлайды Altainews.kz тілшісі.

Бұл жоба – еліміздің үздік оқушыларына, спортта, өнерде және ғылымда жетістікке жеткен дарынды балаларға арналған демалыс пен дамудың жаңа кеңістігі болмақ.

Инесса Чернышева атап өткендей, лагерь 200 балаға арналған және республикалық деңгейдегі маңызға ие болады. Мұнда тек демалу ғана емес, оқу, шығармашылық даму, спорттық жаттығулар, зияткерлік бағдарлама және арнайы қажеттіліктері бар балаларға бейімделген білім беру жүйесі де жүзеге асырылады. Жобада әр маусым түрлі бағытта өтеді: шығармашылық, ғылыми, спорттық және инклюзивті.

Әзірге лагерьдің атауы жоқ, жобаның жұмыс атауы- қазақстандық «Артек». Болашақта лагердің атауы балалар мен жасөспірімдер арасында өтетін арнайы  байқау арқылы таңдалады. Ұйымдастырушылардың пікірінше, бұл бастама балалардың қызығушылығын оятып, жобаның мәнін тереңірек түсінуге жол ашады.

Лагерьде сабақ қазақ және орыс тілдерінде жүргізіледі. Мұндағы басты мақсат — демалысты пайдалы өткізу ғана емес, баланың жеке қабілетін дамытуға, терең білім алуына жағдай жасау.