Бүгін биылғы оқу жылының аяқталуына байланысты еліміздің мектептерінде бірқатар салтанатты шаралар ұйымдастырылды. Өскемен қаласындағы іргелі білім беру ұйымының бірі – №48 мектеп-қосымша білім беру орталығында өткен «Мектебім, саған мың алғыс!» атты мерекелік жиын да білімгерлер мен түлектерді жинады. Он бір  «Үздік аттестатқа» үміткер, «Алтын белгіден» үмітті он сегіз оқушы бар бұл білім ошағына жиылған қауымды ШҚО әкімінің орынбасары Ермек Нұрғалиев құттықтады, деп хабарлайды Altainews.kz  тілшісі.

Мектеп ауласында өткен салтанатты жиынға Өскемен қалалық мәдениет және тілдерді дамыту бөлімінің басшысы Алмаз Нұрғалиев, мектеп ұстаздары және ата-аналар қатысты. Шара барысында мектеп директоры Чинар Мажинова баяндама жасап, оқу ордасының жетістіктерімен бөлісті. Шығыс Қазақстан облысы әкімінің орынбасары Ербол Нұрғалиев жиналғандарды аймақ басшысы атынан оқу жылының аяқталуымен құттықтап, үлкен өмір жолына қанат қаққан түлектерге сәт-сапар тіледі.

Биылғы оқу жылындағы жалпы мектеп бітіруші түлек саны – 69. Олардың арасында «Үздік аттестатқа» – 11, «Алтын белгіге» – 18 үміткер бар. Бұл уақытта алты мектеп бітіруші түлекке шетел университеттерінен шақырту түскен.

Өз кезегінде ата-аналар да №48 мектеп-қосымша білім беру орталығының ұжымына алғыс білдіріп, жүрекжарды тілектерін айтты.

Мерекелік жиын барысында мектептің қоғамдық-мәдени жұмысына белсене атсалысқан және оқуын үздік аяқтаған оқушылар мақтау қағаздарымен марапатталды. Сондай-ақ ұстаздары шәкірттеріне жылы лебіздерін білдіріп, түлектер өздеріне 11 жыл бойы білім берген мұғалімдеріне қимастықпен алғыс айтып, ән-жырларын арнады. «Алтын белгіге» үміткер түлек 10-сыныптың үздік оқушысына білім кілтін табыстап, оқуда сәттілік тіледі. Түлектердің «Мектеп вальсі» көрермендердің көңілінен шығып, жиналғандар бірін-бірі құттықтап, естелік суреттерге түсіп, мәз-мейрам болып тарқасты.

Фото, видео: Ермек Жиенбеков