Жастар болашағын таңдауда. Шығыста мыңдаған оқушы мен студент мамандықты жүрекпен таңдап, нақты еңбекке бет бұрды. Ең бастысы – ендігі жерде олар бұл жолға жалғыз түспейді. Ел назарындағы «Жұмысшы мамандықтар жылы» аясында қолға алынған «Болашақ мамандары» бағдарламасы – талай ауыл баласына үміт, ал сала мамандарына сенім ұялатты.

Биылдан бастап өңірдегі 152 мектептің жоғары сынып оқушылары жаңа заманның сұранысына сай жұмысшы мамандықтарын таңдады. Бұл – 3696 жас, яғни әрбір екінші мектептен бір топ оқушы болашақ өмірін нақты еңбекпен байланыстыруға бел буғанын білдіреді.

Ата-ана мен мектеп бұрын тек жоғары білімді таңдауға жол ашса, енді оқушы өзі қызыққан кәсіби бағытты 10-11 сыныптан бастап меңгеруге мүмкіндік алды. Бұл – жай ғана бағдар емес, болашаққа жасалған шынайы инвестиция.

Өңірде бүгінде 38 колледж жұмыс істейді, мұнда 19 966 студент оқиды. Олардың дені – ауылдан келген жастар. Әрқайсысы бір мамандықтың қыр-сырын меңгеріп, үлкен өмірге алғашқы қадамын жасайтын сәтке дайындалып жатыр.

Ең қуаныштысы – оқу теориямен ғана шектелмейді. Қазір 27 колледжде 448 өндіріс орнымен серіктестік орнатылып, 5047 студент нақты кәсіпорындарда жұмыс істеп жүріп оқып жүр. Бұл дегеніміз – тек партада емес, нағыз еңбек майданында ысылу.

Мемлекет те жастарды қолдап отыр: биылғы мемлекеттік тапсырыспен 4898 студент тегін оқуға мүмкіндік алды. Ал бұл – республика бойынша ең жоғары көрсеткіштердің бірі.
Қазір 203 кәсіпорын 34 колледжге шефтік қамқорлық жасап отыр. Яғни, оқу ордасымен бірлесе маман даярлайды, қажетті құрал-жабдықпен қамтамасыз етеді, өндірістік тәжірибе ұсынады. Бұл – «дайын кадр керек» деген нарық талабы мен «жұмыс табу қиын» деген жас арасындағы көпірді жоятын нақты қадам.

Биыл Шығыстағы колледждерден 5038 түлек қанат қақпақ. Олар 101 түрлі мамандықты игеріп шықты. Ендігі жерде оларды дұрыс бағыттау – барша қоғамның ортақ міндеті.

Келесі оқу жылына колледждерге 7130 орын бөлінген, соның 940-ы – арнайы мақсатты тапсырыс. Бұл – белгілі бір саладағы маман тапшылығын жоюға арналған, нақты сұранысқа негізделген жоспар.
Қабылдау науқаны 25 маусымда басталады. Сол күннен бастап мыңдаған талапкер өз болашағын колледж табалдырығынан бастайды.

Шынтуайтында, жұмысшы болу – баяғыдай «қалаға жете алмаған» баланың таңдауы емес. Қазір бұл – санаулы жылда табысқа жетудің, қоғамға қажет маман атанудың ең қысқа жолы. Шығыста қолға алынған бұл бастама – әр жасқа үміт, әр ата-анаға сенім сыйлайтын нақты қадам.
Енді бәрі – жастардың таңдауына, ал біз – ересектердің қолдауына байланысты.