Шығыс Қазақстан облысында 95 шағын су электр станциясын салуға мүмкіндік бар. Бұл туралы облыс әкімі Нұрымбет Сақтағанов «Хабар 24» телеарнасындағы «Сұхбат» бағдарламасында айтты, деп хабарлайды Altainews.kz тілшісі ШҚО әкімдігінің баспасөз қызметіне сілтеме жасап.

Аймақ басшысының айтуынша, Шығыста еліміздің су ресурстарының 40 пайыздан астамы шоғырланған. Өзен-көлдерді кешенді зерттеу нәтижесінде жалпы қуаты шамамен 2 гигаватт болатын 95 шағын СЭС салуға қолайлы орындар анықталған.

Әкімдіктің мәліметінше, 2025 жылдың қыркүйегінде Өскеменде өтетін «Altai-Invest» халықаралық инвестициялық форумы аясында осы жобаларға нақты инвесторлар тартылуы мүмкін.

Энергетикалық тәуелсіздік пен «жасыл» энергия көздерін дамыту — өңір үшін маңызды басымдықтардың бірі.